د پاکستانه د کډوالو ستنېدو سره په کندهار کې د تسبيح جوړولو صنعت وده کړې
د پاکستان څخه د يو شمېر افغان کډوالو د کندهار ولايت ته ستنېدل د تسبيح جوړولو د صنعت په ودې او پراختيا کې مرسته کړې ده. د سيمې اوسېدونکي وايي، دا صنعت په وروستيو مياشتو کې لا پياوړی شوی او د يو شمېر کورنيو لپاره یې د کار زمينه برابره کړې ده.
د ورکړل شويو معلوماتو له مخې، هغه کډوال چې له کلونو وروسته له پاکستانه هېواد ته راستانه شوي، د تسبيح د توليد په برخه کې له خپلو مهارتونو او تجربو څخه په ګټې اخيستنې سره کوچني کارګاوې جوړې کړې يا له موجودو فعاليتونو سره يوځای شوي دي. دا کار لامل شوی چې د توليد کچه لوړه شي او د خرڅلاو بازار هم پراخوالی ومومي.
د طالبانو د ادارې ولايتي مسوولينو په کندهار کې ويلي، دوی د دې صنعت ملاتړ کوي او ژمنه یې کړې چې اړينې اسانتياوې به د دې برخې د فعالانو لپاره برابرې کړي. هغوی زياته کړې چې هڅه به وکړي څو د دې دوديز مسلک د لا ودې زمينه برابره کړي.
تسبيح جوړونه د افغانستان په ځينو سيمو کې له پخوانيو لاسي صنايعو څخه ګڼل کېږي، او که پرې اغېزمن ملاتړ وشي، کولای شي د کورنيو لپاره د يو دايمي عايد سرچينه وګرځي. خو يو شمېر صنعتکاران ټينګار کوي چې د ملاتړ د ژمنو عملي کېدل او د بازارموندنې اسانتياوو برابرېدل د دې صنعت د دوام او پرمختګ لپاره ډېر مهم دي.
