په کابل او پکتيا کې درې تنه د نشهيي موادو د قاچاق په تور نيول شوي
د طالبانو د نشهيي موادو پر وړاندې د مبارزې اداره وايي، چې د دوی ځواکونو درې تنه د نشهيي موادو د قاچاق او پلور په تور د کابل او پکتيا ولايتونو کې نيولي دي.
د ورکړل شويو معلوماتو له مخې، دوه تنه په پکتيا ولايت کې د احمدآباد ولسوالۍ په مربوطاتو کې له ۳۳ کيلوګرامه خام چرسو او ۷۵ کيلوګرامه د چرسو تخم سره يو ځای پېژندل شوي او نيول شوي دي. د دغو کسانو له ډلې سره د نيول کېدو پر مهال وسله هم موجوده وه.
په عين وخت کې، د طالبانو پوليسو يو بل کس د کابل ښار د اوومې ناحيې په اړوند سيمه کې له ۲ کيلوګرامه کريستال مت سره نيولی دی.
سره له دې، چې د طالبانو اداره تل د نشهيي موادو د قاچاق پر وړاندې د جدي اقداماتو خبره کوي، خو په ټول هېواد کې د دغو موادو د توليد، قاچاق او مصرف زياتوالی د دې ادارې د نشهيي موادو پر ضد د مبارزې د جوړښتونو ناکامي تر پوښتنې لاندې راولي. لا هم د قاچاق د سترو شبکو د مخنيوي لپاره کومه ملي ستراتيژي او مؤثره طرحه نه ده ليدل شوې.
