د احصايې ادارې رييس په کابل کې د يونيسف له استازو سره ليدنه وکړه
ملي احصايه او معلوماتو ادارې ويلي، چې د دې ادارې عمومي رييس ملا عبدالقاهر حاجي ادريس په کابل کې د ملګرو ملتونو د ماشومانو د ملاتړ صندوق (يونيسف) د جنوبي آسيا لپاره د سيمهييز دفتر له مشره سنجي ويجسکره او په افغانستان کې د يونيسف له مسؤل ډاکټر تاجالدين اويوالي سره ليدنه کړې ده.
د دې ليدنې پر مهال دواړو لورو پر هغو سروېګانو خبرې کړې چې دا مهال روانې دي، لکه «د کورنيو عايد او لګښت سروې» او «د کاري ځواک سروې». د احصایې ادارې په وينا، د دې خبرو موخه د ارقامو په راټولولو او ملي تحليل کې غوره همغږي ده.
ملا عبدالقاهر حاجي ادريس په دې ناسته کې له يونيسف څخه د څو شاخصه ميکس سروې د بيا پلي کولو، د کارکوونکو د ظرفيت لوړولو، او د حياتي احصايې اړوند د زيږون کارتونو د چاپ برخه کې د همکارۍ دوام وغوښت.
نوموړي ټينګار وکړ چې ملي اداره د احصايې او معلوماتو په توګه د هېواد د احصایې معلوماتو د راټولولو او تحليل کولو اصلي بنسټ دی او ژمن دی چې دقيق او اعتبار وړ احصایې اړوند معلومات چمتو کړي او اړوندو ادارو ته يې وسپاري.
په مقابل کې، سنجي ويجسکره ډاډ ورکړی چې د ملګرو ملتونو د ماشومانو ملاتړ صندوق به د خپلو شتو امکاناتو په کتو، له ملي ادارې د احصايې او معلوماتو سره هر اړخيزه همکاري روانه وساتي.
د عامه ادارې د چارو کارپوهان وايي، د نړيوالو بنسټونو لهخوا له تخنيکي افغان ادارو سره د همکاريو دوام، په ځانګړي ډول اوسني حالت کې چې د طالبانو حکومت د احصایې او تعليمي ادارو فعاليتونه تر پراخو محدوديتونو لاندې راوستي، کولی شي د ملي معلوماتو د نظام د يووالي او د معلوماتي شفافيت په ساتنه کې مرسته وکړي.
