د قندهار د انځرو صادراتو کچه سږکال لوړه شوې ده
د قندهار د کرنې، اوبولګولو او مالدارۍ ریاست خبر ورکړی چې سږکال له دې ولایت څخه تر ۳۹ زره ټنه زیات انځر بېلابېلو هېوادونو ته صادر شوي دي. د دې ادارې مسوولینو په وینا، دا شمېر د تېرکال پرتله چې یوازې څه باندې ۱۳ زره ټنه صادر شوي وو، د پام وړ زیاتوالی ښيي.
د دغې ادارې ویاند محمد حنیف حقمل له رسنیو سره په خبرو کې ویلي، د سږني کال صادرات افغان سوداګر ترسره کړي او زیاتره دا محمولې د سیمې او سیمې بهر هېوادونو ته صادر شوې دي، چې پکې متحده عربي امارات، هند، انګلستان، پاکستان، چین، کاناډا، نیپال، جرمني او سعودي عربستان شامل دي.
د طالبانو د واکمنۍ له امله د اقتصادي ستونزو او سیاسي محدودیتونو سربېره، افغان صادروونکي توانیدلي چې د کورنیو محصولاتو، په ځانګړي توګه د قندهار د انځرو لپاره نوي بازارونه پیدا کړي. دا په داسې حال کې ده چې د طالبانو ادارې له خوا د منسجم ملاتړ او هدفمند سیاست نشتون د کرنې سکتور له ګڼو ستونزو سره مخ کړی دی.
د اقتصادي چارو کارپوهان وایي، که چیرې د بزګرانو او صادروونکو لپاره لازم ملاتړ برابر شي، کرنیز محصولات کولی شي چې د کلیوالي کورنیو اقتصادي وضعیت ته پراخه ګټه ورسوي او د ملي عوایدو په زیاتوالي کې مهم رول ولوبوي. خو د طالبانو اداره تر اوسه په دې برخه کې کومه مشخصه طرحه نهده وړاندې کړې.
