د اردن هوايي بریدونه د سوریې پر جنوب؛ د قاچاقګرو پر ضد نوې جګړه
د اردن وسلهوالو ځواکونو اعلان کړی چې د هېواد د شمالي پولو د خوندیتوب لپاره يې د وسلو او نشهيي موادو د قاچاقګرو پر ضد عملیات ترسره کړي دي. د اردني چارواکو په وینا، دغو بریدونو د سوریې د جنوب یو شمېر سیمې په نښه کړي دي. د اردن رسمي خبري اژانس «پترا» راپور ورکړی چې دغه عملیات د قاچاقي ډلو د خوځښتونو په غبرګون کې ترسره شوي او هغو مرکزونو ته متوجه ول چې د اردن خاورې ته د ننوتلو د پايګاو په توګه کارېدل. اردن وايي دا اقدامات د پولو د ګواښونو د مهارولو لپاره د اوږدمهاله امنیتي تدابیرو برخه ده. له بلې خوا، د سوریې الاخباریه ټلوېزیون راپور ورکړی چې د اردن له هوايي بریدونو وروسته، چې د السویدا ولایت په شاوخوا سیمو کې ترسره شوي، اردني ځواکونو د سرحدي کرښې په اوږدو کې د رڼا منورې توغولي دي څو د پولو کنټرول لا پیاوړی کړي. دا بدلونونه څو ورځې وروسته رامنځته کېږي له هغه چې اردن اعلان وکړ له امریکا متحدو ایالتونو سره یې د داعش ډلې پر ضد په سوریه کې په ګډو عملیاتو کې برخه اخیستې، یو اقدام چې د اردني چارواکو په وینا د سرحدي امنیتي ګواښونو د مخنیوي په موخه ترسره شوی دی.
