په استانبول کې د غزې د خلکو د ملاتړ پراخ لاریون ترسره شو
د نوې میلادي کال په لومړۍ ورځ، د ترکیې د استانبول ښار زرګونه اوسېدونکي د غزې له جګړهځپلو او محاصره شوو خلکو سره د همبستګۍ د څرګندولو لپاره په یو پراخ لاریون کې ګډون وکړ. دغه ستره غونډه د چهارشنبې سهار وختي د استانبول په ګالاتا پُل کې پیل شوه، چیرې چې شاوخوا ۴۰۰ مدني بنسټونو او ټولنیزو سازمانونو د دې لاریون په تنظیم کې ونډه لرله. ګډونوالو د «غلی به نه پاتې کېږو» او «فلسطین به هېره نه کړو» شعارونه ورکول او له نړیوالې ټولنې یې غوښتنه وکړه چې د غزې د خلکو وضعیت ته پاملرنه وکړي. د ترکیې د رسنیو د راپور له مخې، ښاریان د نمځلې له لمانځه وړاندې او د سختې یخنۍ سره سره، په تاریخي جوماتونو لکه ایاصوفیه کبیره، سلطان احمد، فاتح، سلیمانیه او امیناونو کې راټول شول او وروسته یې په ګډه د ګالاتا پُل پر لور حرکت وکړ. د لاریون پرمهال د ترکیې د امنیتي ځواکونو له خوا د پراخو امنیتي تدابیرو پلي کولو خبر ورکړل شو. معترضانو د «عدالت د فلسطین لپاره، وجدان د نړۍ لپاره» په شان شعارونه او پلاکاردونه له ځانه سره درلودل او د فلسطین د مقاومت په ملاتړ او د غزې د دوامدارو تاوتریخوالو او بشري وضعیت پر وړاندې یې خپل اعتراض څرګند کړ.
