د اسرایيلو استوګنځایوالو د لبنان خاورې ته د داخلېدو راپور خپور شو
د اسرایيلو د تلویزیون دولسمې شبکې راپور ورکړی چې لسګونه استوګنځایوال د لبنان او د اسرایيلو تر کنترول لاندې سیمو تر منځ له پوله اوښتي او د لبنان خاورې ته داخل شوي دي. د راپور له مخې، یاد کسان د جنوبي لبنان یارون سیمې ته تللي دي.
راپور زیاتوي چې دغه استوګنځایوال غواړي د لبنان دننه د اسرایيلو استوګنځایونه جوړ کړي، یو داسې اقدام چې کېدای شي د دواړو خواوو تر پولو د تاوتریخوالي کچه لوړه کړي.
ملحم خلف، د لبنان د پارلمان استازي، د دې پېښې په غبرګون کې ویلي چې دا عمل د «بېسابقې بېشرمۍ» څرګندونه کوي. نوموړي ټینګار کړی چې لبنان د استوګنځای جوړونې د پروژو ځای نه دی او د دغه هېواد حاکمیت د سرې کرښې حیثیت لري.
یارون سیمه د لبنان په جنوب کې د پولي کرښې ته نږدې موقعیت لري؛ دا یوه هغه سیمه ده چې په تېر کلو کې هم د دواړو لورو تر منځ د امنیتي تنشونو شاهد پاتې شوې ده. د لبنان رسمي چارواکو تراوسه د دې پېښې په اړه نور جزئیات نه دي خپاره کړي.
