ډونالډ ټرمپ یو ځل بیا وېنزویلا ته د سختو ګامونو خبرداری ورکړ
د امریکا د متحده ایالاتو ولسمشر، ډونالډ ټرمپ، یو ځل بیا وېنزویلا ته ګواښ کړی او ویلي یې دي که د دې هېواد مرستیاله ولسمشر د واشنګټن غوښتنو ته غاړه کښېنږدي، نو امریکا به پر دې هېواد لا سخت اقدامات وکړي.
ټرمپ د نیویارک پوست ورځپاڼې سره په خبرو کې، د الجزیرې د شبکې د راپور له مخې، ادعا وکړه چې «د دوهمې څپې» لپاره چمتووالی نیول کېږي، چې د ده په وینا به دا څپه د لومړۍ مرحلې په پرتله ډېره پراخه وي، او وېنزویلایي چارواکي د هغې له ممکنه پایلو څخه خبر دي. هغه زیاته کړه، تر هغه چې د واشنګټن غوښتنې عملي شوي نه وي، د امریکایي ځواکونو د لېږلو اړتیا نه ویني.
د امریکا ولسمشر دا هم ټینګار وکړ چې پر کیوبا نظامي برید نه پلانوي، او ادعا یې وکړه چې د دې هېواد سیاسي نظام به پرته له بهرني لاسوهنې خپله له منځه ولاړ شي. ټرمپ لا زیات ادعا وکړه چې یو شمېر کیوبایان وروسته له هغې وژل شوي چې د نیکولاس مادورو ملاتړ یې وکړ، خو هېڅ نور جزئیات یې ورنه کړل.
د ټرمپ دا څرګندونې یوازې څو دقیقې وروسته له هغه خپرې شوې، کله چې د وېنزویلا مرستیالې ولسمشرې، دلسی رودریګز، په یو تلویزیوني وینا کې له پلازمېنې کاراکاس څخه د نیکولاس مادورو او د هغه د مېرمنې د خوشې کېدو غوښتنه وکړه.
رودریګز ټینګار وکړ چې هېواد یې به د هېڅ قدرت مستعمره نه شي، او له وېنزویلایانو یې وغوښتل چې خپل ارام وساتي او د هېواد د دفاع لپاره یو موټی پاتې شي.
هغې چې د وېنزویلا د بهرنیو او دفاع وزیرانو تر څنګ خبرې کولې، وویل، موجوده حکومت په ځای پاتې دی او چمتو دی چې د هېواد د ملي حاکمیت د دفاع لپاره په بشپړه توګه هڅه وکړي. رودریګز همدارنګه پر وېنزویلا د هر ډول بهرني پوځي لاسوهنې مخالفت څرګند کړ او د دې هېواد پر وړاندې وروستیو تاوتریخوالو ته یې غبرګون وښود.
