اسراييلي سرچينې: د ټرمپ د غزې طرحه عملي نه ده؛ د ترکيې د رول لپاره د تلابيب شرطونه
اسراييلي سياسي سرچينو منلي چې د امريکا د ولسمشر ډونالډ ټرمپ وړانديز شوې طرحه، چې موخه يې د نړيوالو ځواکونو استقرار په غزه کې ده، له جدي ستونزو سره مخ ده او د اوسنيو حالاتو له مخې د عملي کېدو وړ نه ده. د دغو سرچينو په وينا، د مهمو هېوادونو د نه لېوالتيا له امله د ځواکونو د لېږلو لپاره، د دې طرحې راتلونکی له ابهام سره مخ شوی دی.
د معاريو ورځپاڼې د دغو سرچينو له قوله راپور ورکړی چې سره له دې چې تلابيب له پخوا د ترکيې د ګډون مخالفت کړی و، اوس د دې امکان شته چې د ځانګړو شرايطو پوره کولو په صورت کې د دې ونډې منل وڅېړل شي. د سرچينو په وينا، دا دريځ بدلون له انقرې څخه د ځينو ځانګړو غوښتنو د پوره کولو پورې تړاو لري.
د راپور له مخې، اسراييلي چارواکي له رجب طيب اردوغان، د ترکيې له ولسمشر، غواړي چې په ښکاره توګه د خپلو تېرو تندو څرګندونو په اړه، چې د اسراييلو پر مشرانو يې کړې وې – په ځانګړي ډول هغه څرګندونې چې بنيامين نتنياهو يې له هېتلر سره پرتله کړی و – وضاحت ورکړي. همدارنګه له ترکيې تمه کېږي چې د تلابيب په اړه په خپلو تګلارو کې څرګند بدلونونه وښيي.
دا په داسې حال کې ده چې د ترکيې او اسراييلو اړيکې، په ځانګړي ډول د اقتصاد او سوداګريزو تبادلو په برخه کې، حتا د غزې د جګړې پر مهال هم په بشپړه توګه نه وې پرې شوې او په ځينو برخو کې دوام لري. له دې سره سره، د نړيوالو ځواکونو د استقرار طرحې نامعلوم برخليک او سياسي اختلافونه، د دې نوښت د عملي کېدو راتلونکی لا هم نامعلوم ساتلی دی.
