د اسرایيلو د لبنان پر وړاندې د ځمکنۍ پوځي عملياتو د پلان ارزونه
د اسرایيلو رسنيو راپور ورکړی چې د دغه هېواد چارواکي د لبنان پر ضد د يوې احتمالي ځمکنۍ پوځي حملې د طرحې ارزونه کوي؛ هغه اقدام چې د دغو رسنيو په وينا د «حزبالله د ګواښ» د ځواب په موخه مطرح شوی دی.
د راپورونو له مخې، دا موضوع د اسرایيلو د لومړي وزير بنیامین نتنياهو او د امريکا د ولسمشر ډونالد ټرمپ تر منځ د فلوريدا په ايالت کې د ليدنې پر مهال هم ياده شوې، او د لبنان پر خاوره د بریدونو پراخول د بحث له انتخابونو څخه يو بل ګڼل شوی دی.
په راپورونو کې ادعا شوې چې حزبالله د اوربند په موده کې توانېدلی د خپلو ځينو پوځي ظرفيتونو بيا رغونه وکړي او د لبنان حکومت نهدی توانېدلی دا ډله په بشپړ ډول تر کنترول لاندې راولي؛ يوه ادعا چې په لبنان کې تل د بېلابېلو غبرګونونو سره مخ شوې ده.
د اسرایيلو د راډيو او تلويزيون اداره وايي، د ټرمپ تر مشرۍ لاندې د امريکا حکومت د اسرایيلو د پوځي اقدام په اړه ښکاره مخالفت نهدی څرګند کړی، خو نتنياهو ته يې ویلي چې د بيروت سره د لا زياتو خبرو اترو د زمينې د برابرېدو لپاره دې له بېړې ډډه وکړي.
په وروستيو مياشتو کې، اسرایيلو په لبنان کې د حزبالله اړوندو هدفونو پر وړاندې محدود بريدونه او فشارونه ترسره کړي دي. په ورته وخت کې، د لبنان حکومت ويلي چې د ناقانونه وسلو د کنترول او د وسلهوالو ډلو د فعاليتونو د څارنې لپاره اقدامات پيل کړي دي.
حزبالله د بشپړ بېوسلې کېدو مخالفت کړی او ټينګار کوي چې د ځان د دفاع حق لري او خپل پوځي توان د بازدارۍ د تګلارې يوه برخه بولي. په ورته حال کې، د دې حالت دوام د څېړونکو د اندېښنې سبب شوی او دوی خبرداری ورکوي چې ښايي د لبنان او اسرایيلو تر منځ د سرحدي تاوتريخوالي د پراخېدو امکان زيات شي.
