د اسراییلي پوځ د سرتېرو کمښت بېساری کچي ته رسېدلی
یوه اسراییلي ورځپاڼې راپور ورکړی چې د اسراییل پوځ د انساني ځواک له بېساري کمښت سره مخ شوی او د سرتېرو د استعفا غوښتنې تر دې دمه بحراني پړاو ته رسېدلي دي.
د عبري ژبې ورځپاڼې “یدیعوت آحارانوت” لیکلي، دغه بحران چې د غزې په اوږدې جګړه کې څرګند شوی، اوس “د ټکو نقطې ته” رسېدلی، او تمه ده چې دایمي ځواک نور سرتېري هم د خپلې دندې د وخت نه مخکې پای ته رسېدو غوښتنه وکړي. د راپور له مخې، د تېر کال راهیسې تر اوسه پورې د پوځ د عمومي قرارګاه په کچه له ۵۰۰ ډېرې دا ډول غوښتنې پاتې دي.
ورځپاڼه وړاندې زیاتوي چې دا غوښتنې عملاً د استعفا معنې لري، او اصلي دلیل یې د کم معاش په مقابل کې د پوځیانو شدید جسمي او رواني فشارونه، په ځانګړي ډول د جګړې پر مهال، ښودل شوی. که څه هم پوځ دا مهال دا استعفاوې نه منې، خو د زرګونو افسرانو د ساتلو په برخه کې له جدي ستونزو سره مخ دی.
راپور وايي، دا بهیر د پوځ د انساني ځواک پر کیفیت څرګنده منفي اغېزه کړې او اوږدمهاله خطرونه رامنځته کوي. یوه لوړپوړي پوځې چارواکي ورځپاڼې ته ویلي چې ځوان افسران د تقاعد شرایطو د خرابېدو له کبله هڅه کوي چې په کم عمر کې له دندې ووځي او د ملکي سکتورونو له لارې لوړې عواید ترلاسه کړي.
له بلې خوا، د سرتېرو د کمښت د جبران لپاره اسراییلي پوځ د مکلفې خدمت مودې درې کلونو ته د زیاتولو وړاندیز کړی. دا کمښت تر هغه وروسته لا جدي شو، چې ګڼ شمېر سرتېري، په ځانګړي ډول د جګړې په لیکو کې، ووژل شول یا ټپیان شول. د اوسني قانون له مخې ټاکل شوې چې تر ۲۰۲۷ کال پورې د مکلفې خدمت موده کمه شي؛ خو ورځپاڼه وايي، دا کار د انساني ځواک موجوده تشه لا نوره پراخولای شي.
