سلګونه د داعش د کورنیو غړي له الهول کمپ څخه تښتېدلي
د سوریې سرچینو ویلي چې د تېرو ۷۲ ساعتونو په ترڅ کې سلګونه کسان د هغو کورنیو له ډلې چې د داعش له ډلې سره تړاو لري، د شمال ختیځ سوریې د الهول له کمپ څخه تښتېدلي دي؛ دغه پېښه نوې امنیتي اندېښنې راپورته کړي دي.
د محلي رسنیو د راپورونو له مخې، دغه کسان چې بېلابېلې تابعیتونه لري، د کمپ له ګډوډ وضعیت څخه په استفادې سره وتښتېدل. ویل کېږي، دا امکان شته چې دا تېښته د مخکېني پلان له مخې ترسره شوې وي، په ځانګړې توګه ځکه چې د سیمې د امنیتي څارنې په اړه نیوکې روانې دي.
یادې سرچینې خبرداری ورکوي چې تښتېدلي کسان ښايي په راتلونکې کې د داعش د پټو شبکو په فعالو ډلو بدل شي. د دوی په باور، دا ډول پېښه کولی شي په سیمه کې نوې امنیتي ګواښونه رامنځته کړي.
د الهول کمپ چې د الحسکه په ولایت کې موقعیت لري، د هغو زرګونو کسانو د ساتنې ځای دی چې د داعش د غړو کورنۍ جوړوي. راپورونه وايي چې دا ډلهییزه تېښته پوښتنې راپورته کوي چې څنګه دا کار د سیمې د امنیتي ځواکونو د شتون سره سره ترسره شو؛ امریکايي ځواکونه هم د دې کمپ ترڅنګ مېشت دي، خو تر اوسه يې د دې پېښې په تړاو هېڅ څرګندونې نه دي کړې.
