عراقي فعالان: امريکا د نوي حکومت په جوړولو کې لاسوهنه کوي
يو شمېر سياسي څېرې او شنونکي په عراق کې د امريکا پر هغه څه چې د دغه هېواد د راتلونکي حکومت په جوړولو کې لاسوهنه بلل شوې، اندېښنه څرګندوي.
عبدالرحمن الجزایري، چې د عراق د ملي عشایري جریان مشر دی، وايي د امريکا د ولسمشر ډونالد ټرمپ ځانګړی استازی مارک ساوایا د امريکا له خوا پيغام سره راغلی او هغه یې له ۱۳ شرطونو سره د عراق له راتلونکي حکومت سره د تعامل لپاره وړاندې کړي دي. د الجزایري په وینا، امريکا هڅه کوي چې خپل ګټې په عراق کې تضمين کړي.
د عراق د سياسي چارو شنونکی ابراهیم السراج هم ټینګار کوي، چې دا ډول لاسوهنې د امريکا له خوا نوی اړخ نه لري، خو دا ځل د راتلونکي صدراعظم د ټاکلو د خبرو اترو په تاوده پړاو کې، اندېښنې ډېرې شوي دي. ده وويل: “که څه هم امريکا هڅه کوي مستقيم رول ولوبوي، خو د صدراعظم د ټاکنې وروستۍ پرېکړه د پارلمان د اکثريت ډلې په واک کې ده.”
دا اندېښنې په داسې حال کې راپورته شوې دي، چې عراق د مېنځه ختیځ په سیمه کې یو ستراتيژيک هېواد ګڼل کېږي او په تېرو دوه لسیزو کې یې څو ځله د امریکا سياسي او پوځي حضور تجربه کړی. دا وضعیت ښايي پراخ سیمه يیز او نړیوال اغېز ولري.
په افغانستان کې شنونکي هم له ورته تجربو سره مخ دي، خو د یوه منتخب او ځواب ویونکي حکومت د نشتوالي له امله، د طالبانو د ادارې له خوا د بهرنیو لاسوهنو پر وړاندې د غبرګون څرنګوالی لا هم نامعلوم پاتې دی.
