د ملګرو ملتونو کې د ایران استازولۍ د ټرمپ څرګندونې رد کړې
د ایران اسلامي جمهوریت دایمي استازولۍ د ملګرو ملتونو سرمنشي او د امنیت شورا رئیس ته په یو لیک کې د امریکا د ولسمشر ډونالډ ټرمپ وروستیو څرګندونو ته غبرګون ښودلی او دغه څرګندونې یې د ملګرو ملتونو له منشور سره په ټکر کې بللې دي.
په دې لیک کې چې د ایران سفیر او دایمي استازي امیر سعید ایرواني استولی، د ټرمپ څرګندونې «د زور کارونې څرګنده ګواښ» بلل شوې دي. په لیک کې ویل شوي چې دا ډول دریځونه غیرمسوولانه او پاروونکي ځانګړتیا لري او د نړیوالو قوانینو له بنسټیزو اصولو سره په تضاد کې دي.
د ایران استازولۍ خبرداری ورکړی چې د دغسې څرګندونو دوام کولای شي د سیمې تاوتریخوالی لا زیات کړي، د ناسمې محاسبې خطر لوړ کړي او د نړیوالې سولې او امنیت پر وړاندې مستقیم ګواښ رامنځته کړي؛ هغه موضوع چې د لیک له مخې، د ملګرو ملتونو د امنیت شورا جدي پاملرنې ته اړتیا لري.
ایرواني همدارنګه ټینګار کړی چې که هر ډول وسلهوال برید یا یرغل ترسره شي، ایران به د خپل حاکمیت، ځمکنۍ بشپړتیا او خلکو د دفاع لپاره ټولې اړینې لارې چارې وکاروي، او د داسې حالت د امکان وړ پایلو مسوولیت یې د متحده ایالاتو پر غاړه بللی دی.
