د بتاح تکفا او بیت یام ښارونو ته د ایران د توغندیو بریدونه؛ د ژغورنې ډلې سیمې ته استول شوي
د اسراییلي رسنیو د راپورونو له مخې، د ایران د تازه توغندیو بریدونو په پایله کې د اسراییلو په شمالي او مرکزي برخو کې څو سیمې، په شمول د تلابیب ښار، په نښه شوي او یو شمېر کسان ټپیان شوي دي.
د الجزیرې د شبکې په وینا، اسراییلي خبري سرچینو ویلي چې د «اصبع الجلیل» په سیمه کې څو تنه د توغندیو د مستقیمو بریدونو له امله ټپیان شوي دي. دغه سرچینې همدارنګه راپور ورکړی چې د هدف ګرځول شویو ودانیو ته زیان رسېدلی دی.
د راپورونو پر بنسټ، د اسراییلو په مرکزي ښار «بتاح تکفا» کې هم یو توغندی په مستقیم ډول لګېدلی دی. د دغه هېواد د بیړنیو چارو ادارو ویلي چې د مرستې ټیمونه د پېښې ځای ته استول شوي دي.
اسراییلي رسنیو همدارنګه ویلي چې یو توغندی چې څو برخي لرونکی جنګي سر یې درلود، د تلابیب ترڅنګ د «بیت یام» سیمې ته لګېدلی دی. د دغو سرچینو په وینا، له برید وروسته د څو چاودنو غږونه اورېدل شوي چې د توغندي د جنګي سر د څو برخیز جوړښت له امله بلل کېږي.
راپورونه څرګندوي چې په یوه هدف ګرځول شوي ودانۍ کې اورلګیده رامنځته شوې او د بیړنیو مرستو ډلې د اور د مهارولو او د ټپیانو د لیږد لپاره حاضرې شوې دي. تر دې دمه د تلفاتو دقیق شمېر یا د زیانونو کچه نه ده اعلان شوې.
