د ایران د بریدونو له امله نږدې دوه زره کسان په اسراییلو کې ټپیان شول
د اسراییلو د روغتیا وزارت ویلي چې له هغه راپدېخوا چې د ایران سره نښتې پیل شوې دي، لږ تر لږه ۱۹۲۹ کسان د توغندیو او بېپېلوټه الوتکو د بریدونو له امله ټپیان شوي او روغتونونو ته لېږدول شوي دي. دا شمېرې د دې بریدونو د انساني زیانونو په اړه تازه رسمي ارقام ګڼل کېږي.
په دې وزارتني بیان کې ویل شوي، ټپیان د راکټونو، هوایي مرمیو د لګېدو او د هغو د پایلو له امله ژوبل شوي دي. د ټپیانو د روغتیايي حالت یا د احتمالي مالي زیانونو په اړه نور جزئیات نه دي خپاره شوي.
په عین وخت کې، یو شمېر سیمهییزو رسنیو راپور ورکړی چې د دغو بریدونو د تلفاتو او تاوانونو په اړه معلومات د رسنیو له محدودیتونو سره مخ دي. تر اوسه د اسراییلو رسمي چارواکو په دې اړه جلا څرګندونې نه دي کړې.
وروستي نښتې د ایران او اسراییلو تر منځ په سیمه کې ترینګلتیا زیاته کړې او پر دې اندېښنې یې ډېرې کړې دي چې ښايي جګړه پراخه شي.
