د ایران سفیر په اسلاماباد کې د پاکستان او طالبانو د شخړو د سمدستي کمېدو غوښتنه وکړه
د ایران اسلامي جمهوریت سفیر رضا امیريمقدم په اسلاماباد کې د پاکستان او د طالبانو ادارې ترمنځ د زیاتېدونکو ترینګلتیاوو په تړاو د شخړو د سمدستي کمېدو غوښتنه کړې ده. نوموړي خبرداری ورکړی چې د جګړې دوام د هېڅ لوري په ګټه نه دی. دغه څرګندونې په داسې حال کې شوي چې پاکستان دوه شبې وړاندې د ننګرهار، خوست او پکتیکا ولایتونو ځینې سیمې د هوايي بریدونو لاندې ونیولې.
امیريمقدم د سهشنبې په ورځ، د حوت په پنځمه نېټه، په اسلاماباد کې د ستراتېژیکو مطالعاتو په انسټیټیوټ کې د یوې وینا پر مهال وویل چې د ایران او پاکستان ګډ دښمنان هڅه کوي تر څو په سیمه کې بېلتونپالنه خپره کړي. ده ټینګار وکړ چې بېثباتي کولای شي د سیمې د ناامنۍ د پراخېدو لامل شي.
د ایران د سفیر په وینا، د تهران او اسلاماباد ترمنځ سیمهییزو او نړيوالو سازمانونو کې همکاري او همغږي روانه ده او دواړه هېوادونه په بېلابېلو برخو کې په تماس کې دي. د ایران د بهرنیو چارو وزارت تر دې مخکې هم د پاکستان او د طالبانو ادارې ترمنځ د ترینګلتیا د کمولو لپاره د مرستې چمتووالی څرګند کړی و.
اوسنۍ ترینګلتیاوې په داسې حال کې ډېرې شوې دي چې د پاکستان او د طالبانو ادارې اړیکې په وروستیو میاشتو کې له یو شمېر ستونزو سره مخ وې. ځینې شنونکي باور لري چې د دې وضعیت دوام کولای شي د پولو پر سیمو د اوسېدونکو پر امنیتي حالت او ژوند منفي اغېزه وکړي او اړینه ده چې دواړه لوري په مسؤلانه توګه دا وضعيت مدیریت کړي.
