په بلخ کې د لسو مياشتو په ترڅ کې د ۴۰۰ څخه زيات نوي زېږېدلي ماشومان مړه شوي
د بلخ د عامې روغتيا رياست چارواکي وايي، د روان لمريز کال د لومړيو لسو مياشتو په ترڅ کې له شاوخوا ۲۱ زرو هغو نوي زېږېدلي ماشومانو څخه، چې په روغتونونو کې زېږېدلي، ۴۲۳ يې مړه شوي او ۵۸۴ نور د خپل وخت څخه مخکې زېږېدلي دي.
کمالخان زدران، د بلخ د عامې روغتيا رياست وياند، د دغو شمېرنو د پخلي پر مهال وويل، ټول دا زيږونونه د روغتونونو د ولادت په څانګو کې ثبت شوي، او د ماشومانو مړينه او د وخت نه مخکې زيږون لا هم د دې ولايت جدي روغتيايي ستونزه ګڼل کېږي.
ډاکټران د دې وضعيت اساسي لاملونه د لوړ فشار، د شکر ناروغي، رواني فشار، ناسمه تغذيه او د زودهنګامو وادهونو مسئله بولي. له بلې خوا، يو شمېر د بلخ اوسېدونکي چې د دوی ناروغان په ابوعلي سينا حوزوي روغتون کې بستر دي، د ولادت او ماشومانو د څانګې له روغتيايي خدماتو خوښي څرګندوي.
ابوعلي سينا حوزوي روغتون د شمال افغانستان له سترې درملنې مرکزونو څخه ګڼل کېږي او هره ورځ زرګونه ناروغان تداوي کوي. روغتيايي کارپوهان ټينګار کوي، چې پرته له اغېزناکو پوهاوي پروګرامونو، منظمې مخکې له زېږون پاملرنې، او د زودهنګامو وادهونو د مخنيوي له هڅو، د ماشومانو د مړينې کچه راکمول سخت دي؛ يوه موضوع چې د طالبانو د ادارې له جدي پاملرنې سره د مور او ماشوم د روغتيا پر برخه کې اړتيا لري.
