د وروستیو اورښتونو وروسته د هېواد درې مهمو بندونو د اوبو کچه ډېره شوې ده
د طالبانو د اوبو او انرژۍ وزارت اعلان کړی چې د وروستیو اورښتونو له امله د کابل د قرغې بند، د غزني د سلطان بند او د هرات د پاشدان بند د اوبو سطحه په څرګنده توګه لوړه شوې ده.
یاد وزارت ویلي چې د دغو بندونو د اوبو زېرمو زیاتوالی کولای شي په داسې شرایطو کې چې افغانستان له اقلیمي بدلونونو او پرلهپسې وچکالیو سره مخ دی، د کرنیزو سیمو د خړوبولو لپاره یوه مهمه موقع برابره کړي.
د یادې ادارې مسوولانو همدارنګه زیاته کړې چې په دغو بندونو کې د اوبو زیاتوالی د اوبو د سرچینو د ښه مدیریت او د خوړو د خوندیتوب د پیاوړتیا ظرفیت زیاتوي؛ هغه موضوع چې په وروستیو کلونو کې د کم اورښت او اوږدمهالو وچکالیو له امله د هېواد د کروندګرو لپاره یوه جدي ننګونه ګرځېدلې ده.
کارپوهان تل ټینګار کوي چې د اوبو له زېرمو څخه مؤثر او پلانکړل شوی کار او همدارنګه د اوبو د مدیریت پر بنسټيزو زېربناوو پانګونه د راتلونکو بحرانونو د مخنیوي او د کرنې د برخې د ملاتړ لپاره حياتي ارزښت لري؛ هغه برخه چې د هېواد د ډېرو اوسېدونکو معیشت ورپورې تړلی دی.
