د تالقان د جامع جومات امام بهرني رسنۍ «شیطان» وبللې
د تخار ولایت د تالقان ښار د مرکزي جامع جومات امام زکریا فایز، چې د طالبانو د ادارې له ملاتړو څخه ګڼل کېږي، پرون د جمعې د لمانځه په خطبه کې بهرني رسنۍ «شیطان» وبللې او له خلکو یې وغوښتل چې په خپلو کورونو کې د دغو رسنیو له تعقیب څخه ډډه وکړي.
هغه په خپلو خبرو کې ټینګار وکړ چې خلک باید «حقیقت» له بهرنیو رسنیو ترلاسه نه کړي او د دې رسنیو بایکاټ یې د سمې پوهاوي لاره وبلله؛ داسې څرګندونې چې په مستقیم ډول اورېدونکي دې ته رابولي چې خپل لاسرسی د خپلواکو خبري سرچینو ته محدود کړي.
دغه دریځ په داسې حال کې څرګندېږي چې د طالبانو د ادارې له بېرته راتګ وروسته، د رسنیو کاري فضا له پراخ سانسور او جدي محدودیتونو سره مخ ده. د رسنیو د ملاتړ بنسټونو د راپورونو پر بنسټ، پر خبریالانو فشار زیات شوی او کورنۍ رسنۍ تر پخوا ډېر د سخت څار لاندې دي.
منتقدان وايي، له رسمي منبرو څخه دا ډول څرګندونې، د طالبانو له محدودوونکو سیاستونو سره يو ځای، د هېوادوالو د خپلواکو او بېلابېلو معلوماتو د لاسرسي حق کمزوری کوي او رسنۍ د حاکمې قوې د تبلیغاتي وسیلې په توګه راټیټوي؛ هغه څه چې د آزاد اطلاعرسونې له اصولو او د ټولنې د پوهاوي له اړتیا سره په ټکر کې دي.
