په هرات کې د فطر عيد په مناسبت د ۲۰۷ زندانيانو خوشې کېدل
د طالبانو د ادارې تر کنټرول لاندې رسنيو راپور ورکړی چې په هرات ولايت کې د فطر د مبارک عيد په مناسبت ۲۰۷ تنه زندانيان له بنده آزاد شوي دي. د باختر خبري آژانس د معلوماتو له مخې، دا ګام د طالبانو د ادارې د سترې محکمې د حکم پر بنسټ عملي شوی دی.
په راپور کې راغلي چې له خوشې شوو کسانو څخه ښځې او ماشومان هم شامل دي. همدارنګه، د ۲۲۹ نورو زندانيانو د بند موده رخصت شوې او د هغوي په جزا کې تخفيف ورکړل شوی دی.
سره له دې چې دا خبر اعلان شوی، د طالبانو اداره د خوشې شوو زندانيانو د هويت، د تورونو نوعيت او د بند د مودې په اړه هېڅ جزييات نه دي ورکړي. د قضايي دوسيو د شفافيت نشتوالی او د هغو د څېړنې څرنګوالی، د بشري حقونو د بنسټونو له لوري همېشه د نيوکې وړ موضوع بلل شوې ده.
د حقوقي چارو کارپوهان ټينګار کوي چې د قضايي پروسو او د افرادو د نيولو د علتونو په اړه روڼ معلومات ورکول، د عدالت او د خلکو پر وړاندې د حساب ورکونې له بنسټيزو اصلونو څخه شمېرل کېږي؛ هغه اصل چې په وروستيو کلونو کې په افغانستان کې له جدي ستونزو سره مخ شوی دی.
