د هرات والي د وريجو او غوړو د وارداتو د زياتوالي غوښتنه وکړه
د طالبانو د هرات ولايت محلي اداره اعلان کړی چې د روژې مبارک مياشتې له رارسېدو سره، د خوراکي توکو په ځانګړي ډول د وريجو او غوړو د وارداتو زياتوالی د دې ولايت د لومړيتوبونو څخه دی، څو په بازارونو کې د دغو توکو عرضه پياوړې او د خلکو لاسرسی ورته اسانه شي.
شيخ مولانا اسلامجار، د هرات والي، د وريجو او غوړو له واردوونکو سره په ناسته کې ويلي چې د روژې په مياشت کې بايد د دغو توکو کافي اندازه په بازارونو کې موجوده وي، تر څو د بېرويه بیو د لوړېدو مخه ونيول شي او د کورنيو اقتصادي فشار راکم شي.
هغه له سوداګرو وغوښتل چې د وريجو او غوړو واردات دې د خپل کاري لومړيتوب برخه وګرځوي او ډاډ يې ورکړ چې د دغو توکو د لېږد بهير به د هرات–خواف د اورګاډي له پټلۍ، د اسلامقلعه له ګمرک او د تورغنډي له بندره تسهيل شي.
خو اقتصادي شنونکي ټينګار کوي چې يوازې د وارداتو زياتوالی بسنه نه کوي او د طالبانو اداره بايد د بازار د څارنې، د احتکار د مخنيوي او د وېش د شفافيت په برخه کې هم جدي تمرکز ولري، څو د بيې کمښت په عملي ډول د خلکو پر ګټه تمام شي.
