هرات د ایران او مرکزي آسیا له لارې صادراتو ته مخه کړې
په هرات ولایت کې سیمه ییز چارواکي وايي، له پاکستان سره د سوداګریزو لارو له تړل کېدو وروسته، افغانستان خپله بهرنۍ سوداګري د ایران او مرکزي آسیا هېوادونو لارو ته متمرکزه کړې ده. دوی ټینګار کوي چې دغه مسیرونه دا مهال د هېواد د صادراتي توکو په لېږد کې مهم رول لري.
په تازه پېښه کې، د هرات ځینې کورني تولیدات د ایران او مرکزي آسیا د ترانزیتي لارو له لارې متحده ایالاتو او روسیې ته صادر شوي دي. دا اقدام داسې مهال شوی چې زیات شمېر تجار د پاکستان سره د تجارتي اړیکو د محدودیتونو او بېثباتۍ له امله شکایت کوي.
د سیمهییزو ادارو د معلوماتو له مخې، د هرات صنعتي ښارګوټي له ۱۱۰ فابریکو څخه تولیدات لسګونو هېوادونو ته صادرېږي. د هرات د سوداګرۍ او پانګونې خونه وايي، سږ کال یوازې د دغه ولایت څخه شاوخوا ۶۰ میلیونه ډالرو په ارزښت توکي صادر شوي دي.
یوشمېر تجارانو خبرداری ورکړی چې که طالبان اداره ونه شي کولای یو باثباته او روڼ اقتصادي سیاست وضع کړي، نو د افغانستان لاسرسی سیمهییزو او نړیوالو بازارونو ته به له ګواښ سره مخ پاتې شي. د شنونکو په باور، په یوه ګاونډي هېواد پورې زیات حد پورې تړلتیا او د طالبانو تر واک لاندې د مشخص اقتصادي پالیسۍ نهشتون، د پانګوالو تر منځ د بېباورۍ او اقتصادي رکود له عمده لاملونو څخه دي.
