په هرات کې د زلزلې له امله ویجاړ شوی مکتب بېرته رغول کېږي
د ملګرو ملتونو د بشري مېشت ځایونو ادارې اعلان کړی چې د هرات ولایت د رباطسنگي ولسوالۍ «لکلکخانه» مکتب بېرته رغوي. دا مکتب دوه کاله وړاندې د سختې زلزلې له امله ویجاړ شوی و، او اوس د رغونې له پای ته رسېدو وروسته به له ۴۰۰ ډېرو زدهکوونکو ته بېرته د زدهکړې زمینه برابرېږي.
دغه اداره د پنجشنبې په ورځ، د قوس ۲۰مه، په یو بیان کې ویلي چې موخه یې دا ده چې په طبیعي پېښو کې مقاوم مکتبونه جوړ کړي، تر څو د ماشومانو زدهکړه آن په بحراني حالاتو کې هم نه ودرېږي. د ملګرو ملتونو د بشري مېشت ځایونو اداره همداراز ویلي چې زدهکړه د طبیعي پېښو تر شا د ټولنیز بېرته رغونې بنسټیزه برخه ده.
تر دې وړاندې هم، دغه اداره د محلي ادارو په همکارۍ د هرات په ولایت کې دوه نور مکتبونه رغولي وو. د افغانستان لوېدیځو سیمو وروستیو زلزلو تعلیمي بنسټونو ته پراخ زیان اړولی او د دغو مرکزونو د بېرته رغونې اړتیا یې ډېره کړې ده. په داسې حال کې چې د طالبانو حکومت له خوا د خوندي او دوامداره زدهکړې لپاره کافي ملاتړ نه شته، نړیوالې ادارې لکه د ملګرو ملتونو د بشري مېشت ځایونو اداره د افغان ماشومانو د زدهکړې د دوام لپاره مهم رول لوبوي.
