ملګري ملتونه: د کوکنارو بندیز اغېزمنو بزګرو ته بدیلي معیشتي لارې برابروو
د ملګرو ملتونو د پراختیايي پروګرام (UNDP) خبر ورکړی چې د «ACRP» پروژې له لارې په افغانستان کې د سیمهییزو ټولنو د مقاومت پیاوړتیا ته هڅې روانې دي. د دې پروګرام تمرکز پر هغو کلیوالو بزګرو دی چې د کوکنارو کر د بندیز له امله اغېزمن شوي او اوس ورته د بدیلو معیشتي لارو برابرولو هڅې کېږي.
په دې اعلامیه کې ویل شوي چې دغه پروګرام په عین وخت کې د سختې خوړو ناامنۍ او خوارځواکۍ ته هم ځواب وايي؛ هغه ننګونې چې د اقلیم د بدلونونو، د خلکو بېځایه کېدو او نورو هممهاله فشارونو له امله لا زیاتې شوي دي.
طالبانو د کوکنارو کر بند کړی، خو د دوامدارو اقتصادي بدیلو لارو له برابرولو پرته، دا پریکړه د زرګونو بزګرو کورنیو معیشت له چارو سره له جدي ګواښ سره مخ کړې ده او کلیوالي ټولنې یې له بشري مرستو لا زیاتې پورې تړلې کړي دي.
نړیوالو ادارو بیا بیا ټینګار کړی چې د نشهیي توکو د کر ضد هر ډول پالیسي یوازینی بریالیتوب هغه وخت لرلای شي، چې عملي پروګرامونه لکه د کار زمینې، دوامداره عاید او بازار ته د بزګرو لاسرسی پکې شامل وي؛ یو موضوع چې د منتقدینو په باور، دا مهال د طالبانو په پالیسیو کې په پوره ډول نه ده شامله.
