د طلا بیه راټیټه شوې؛ بازار د ټرمپ د فدرال ریزرف نوماند څرګندونو ته متوجه شوی
د دوشنبې د ورځې په پیل کې د نړيوال طلا بیه راکمه شوې ده؛ دغه کمښت د پانګهوالو لهخوا د کوین وارش د نظریاتو د ارزونې له امله رامنځته شوی، هغه څوک چې د امریکا اوسنی ولسمشر ډونالډ ټرمپ د فدرال ریزرف د مشرۍ لپاره نومولی دی.
د راپورونو له مخې، نن د طلا د هر اونس بیه شاوخوا ۴۵۵۲ ډالرو ته رسېدلې ده. دا په داسې حال کې ده چې تېره پنجشنبې طلا بېسارې کچې ته، یعنې ۵۵۹۴ ډالر او ۸۲ سنتو ته ختلې وه، او اوسنی کمښت د تېرو څو ورځو د چټک زیاتوالي د طبیعي سمون په توګه ګڼل کېږي.
شنونکي وايي، سره له دې چې تمه کېږي وارش به که دا څوکۍ تر لاسه کړي، په یوه وخت کې د سود د کچې د کمېدو ملاتړ وکړي، خو هغه په مالي سیاستونو کې یو احتیاطکار څېره بلل کېږي. د هغه تمرکز د انفلاسیون پر مهار او د کمېشنري اسانتیاوو او د فدرال ریزرف د ترازنامې د پراخېدو پر ضد انتقاد باندې دی. د بازارونو له نظره، دا تګلاره کولای شي د ډالر پیاوړتیا او د طلا پر بیه فشار رامنځته کړي.
سره له دې، لا هم روښانه نه ده چې که وارش وټاکل شي، د سود د کچې د کمولو بهیر به په کوم سرعت پرمخ بوزي او ایا به د فدرال ریزرف د پالیسیو په تګلاره کې جدي بدلونونه رامنځته کړي که نه.
د اوسني کمښت باوجود، د پانګهوالو یوه برخه لا هم تمه لري چې فدرال ریزرف به په ۲۰۲۶ کال کې لږ تر لږه دوه ځله د سود کچې راټیټې کړي. طلا او نور بېسود قیمتي فلزات عموماً د ټیټې سود کچې په چاپېریال کې ډېر زړه راښکونکي وي، یو داسې عامل چې په منځمهال کې ښايي د دې فلز پر بیه د ملاتړ سبب شي.
