په غزني کې د آيتالله خامنهاي د شهادت له امله د خلکو غونډه وشوه
سلګونه تنه د غزني ښار اوسېدونکي د حضرت محمد مصطفی (ص) جامع جومات کې د آيتالله خامنهاي، د ايران د اسلامي جمهوريت د مشر، د شهادت له امله د خواشينې څرګندولو او د ايران له ولس سره د همدردۍ د څرګندولو لپاره راټول شوي وو. دا غونډه د غزني ښار د اسلامي فرهنګي مرکز ته نږدې ترسره شوه.
د راپورونو له مخې، آيتالله خامنهاي د امريکا او اسرائيلو د ګډو بريدونو په پايله کې د حوت مياشتې په لسمه نېټه د ايران په يو شمېر ښارونو کې شهيد شوی دی. همدارنګه په دې پېښه کې يو شمېر ايراني چارواکي هم د شهادت لوړ مقام ته رسېدلي دي. د ايران رسمي سرچينو تر اوسه په دې اړه نور جزئيات نه دي خپاره کړي.
د غونډې ويناوالو د آيتالله خامنهاي سياسي او مذهبي ژوند ته اشاره وکړه او د هغه رول یې د سيمې په سياسي بدلونونو کې مهم وباله. ويناوالو هغه «شهيد» ياد کړ او ټينګار یې وکړ چې د هغه سياسي او مذهبي دريځونو په تېرو کلونو کې په سيمهييزو او نړيوالو بحثونو کې پراخ انعکاس درلود.
آيتالله خامنهاي په تېرو لسيزو کې د ايران د اسلامي جمهوريت په سياسي او مذهبي جوړښت کې له اغېزناکو څېرو څخه ګڼل کېده، او دا وروستۍ پېښه د ايران دننه او د سيمې په يو شمېر هېوادونو کې بېلابېلې غبرګونونه راپارولي دي.
