په څو ولایتونو کې د کال لومړی واورې ورېدل؛ بزګران یې د هيلو نښه بولي
د هېواد په څو ولایتونو کې پرون د کال لومړۍ واوره وورېده؛ دا پېښه، په ځانګړي ډول د وچکالۍ له امله زیانمنو شویو بزګرانو لپاره د راتلونکي کرنیز کال د هيلو نښه بلل کېږي.
بزګران وايي چې دا واوره او ورسره بارانونه کولی شي د خاورې رطوبت پیاوړی کړي او د راتلونکي کال کرنیزو محصولاتو حاصل زیات کړي. په هغو سیمو کې چې د باران کمښت پراخ زیانونه اړولي وو، دا بدلون د خلکو له تود هرکلي سره مخ شوی دی.
له دغو سیمو یوه د میدان وردګ ولایت جغتو ولسوالۍ ده، چیرې چې اوسېدونکي د کاریزونو او څاهګانو له وچېدو او د کرنیزو ځمکو د زیان له امله اندېښنه ښيي. د دې ولسوالۍ بزګران هيله څرګندوي چې د ورښتونو دوام به وتوانېږي د تېرو کلونو یوه برخه زیانونه جبران کړي.
سیمهییز اوسېدونکي او روغتیايي کارکوونکي وايي چې وچکالۍ او له هغې راولاړ دوړو او خاورې ډېرې ویروسي او مکروبي ناروغۍ زیاتې کړې وې. د دوی په باور، ورښتونه نه یوازې د چاپېریال له پلوه ګټور دي، بلکې د هوا د پاکېدو له لارې د دغو ناروغیو د کمېدو لامل هم کېدای شي.
د رپوټونو له مخې، د میدان وردګ ترڅنګ په غزني، لوګر، بامیان او د هېواد په یو شمېر نورو سیمو کې هم واوره او باران وورېده. د ژمي له پیل سره، یو شمېر هېوادوال پر دې ټینګار کوي چې د بېوزلو کورنیو وضعیت ته باید پاملرنه وشي او خبرداری ورکوي چې د ژمي سړې هوا، د لارو تړل، د برېښنا پرېکون او د تودوخې د برابرولو ستونزې زیاته ولي.
