په فارياب کې د بندر ولسوالۍ د سړک د لومړۍ پړاو جوړونې کار پيل شو
د فارياب ولايت ځايي چارواکي وايي چې د بندر ولسوالۍ د نښلونکي سړک د جوړولو لومړۍ پړاو کار پيل شوی دی. دا پروژه شل کيلومتره اوږدوالی لري او د ۶۰۴ ميليونه افغانیو په لګښت به پلي شي. د دې کار موخه د ولسوالۍ د اوسېدونکو د تګ راتګ اسانتيا او د ترانسپورټي ستونزو کمول بلل شوی دی.
مولوي حميدالله دانش، د فارياب د عامه ګټو رئيس، ويلي چې د تازه تاسيس شوې بندر ولسوالۍ لپاره په ټوليز ډول څلوېښت کيلومتره سړک طرحه شوی او د لومړۍ پړاو د جوړېدو قرارداد له دوو ساختماني شرکتونو، حنظله بادغيس او ايکرو سره لاسليک شوی دی. د ده په وينا، د دې پروژې دويم پړاو لا هم د تدارکاتو په پړاو کې دی.
د عامه ګټو رئيس زياته کړه چې دغه سړک به د پلې لارې په پام کې نيولو سره نهه متره سور ولري او د جوړولو او قير کولو چارې به د راتلونکو ۲۸ مياشتو په موده کې بشپړې شي. نوموړي هيله څرګنده کړه چې د دې سړک له ګټې اخيستنې سره به د سيمې د تګ راتګ او ترانسپورتي ستونزې راکمې شي.
په همدې حال کې، قاري عبدالناصر جامع، د بندر ولسوال، وايي چې دا ولسوالۍ په تېرو پنځوسو کلونو کې له معیاري سړک بې برخې وه او په ژمي کې د واورې له کبله د دې ولسوالۍ د تګ راتګ لارې د مياشتو لپاره تړلې پاتې کېدې. د ده په وينا، د نورو فصلونو پر مهال هم اوسېدونکي اړ وو چې له سختو او خطرناکو لارو تګ راتګ وکړي چې له امله يې ګڼ ترافیکي پېښې رامنځته کېدې.
سره له دې، يو شمېر ځايي اوسېدونکي وايي چې که څه هم د دې پروژې پيل يو مثبت ګام دی، خو د اوږدې محروميت موده ښيي چې د طالبانو اداره تر اوسه نه ده توانېدلې د لرې پرتو سيمو بنسټيزو اړتياوو ته په منظمه توګه رسېدنه وکړي. دوی زياتوي چې د دې پروژې شفاف او پر وخت پلي کېدل کولی شي د اوسني مسؤلينو د پرمختيايي ادعاوو لپاره يو ازموينې معيار وي.
د بندر ولسوالۍ د فارياب د مرکز، ميمنې، له ښار څخه شاوخوا ۱۰۰ کيلومتره ليرې ده او د دې ولايت له محرومو سيمو څخه شمېرل کېږي. د سيمې اوسېدونکي وايي چې لا هم له ډېرو ټولنيزو او رفاهي خدمتونو بې برخې دي او حتا د دولتي ادارو معیاري ودانۍ هم په دې ولسوالۍ کې نه شته.
