طالبانو د يو پخواني دولتي چارواکي له ايران تر راستنېدو وروسته نيولی دی
ځايي سرچينې په بلخ ولايت کې تاييدوي چې فيض الله خان مخدومي، د پخواني جمهوري نظام د ولسمشر لومړي مرستيال د لوژستيک آمر، له ايران څخه د راستنېدو وروسته د طالبانو د استخباراتو له خوا نيول شوی او تر اوسه یې برخليک نامعلوم دی.
د کورنۍ نږدې سرچينو په وينا، ښاغلی مخدومي شاوخوا اتلس ورځې وړاندې د مزارشريف له خپل کور څخه نيول شوی دی. دغو سرچينو زياته کړې چې تر اوسه د هغه د ساتلو ځای او روغتيايي حالت په اړه هېڅ رسمي معلومات کورنۍ ته نه دي ورکړل شوي.
سرچينې ټينګار کوي چې د ښاغلي مخدومي نيول بې له کومې څرګندې تور لګونې شوي او هغه لا هم تر بند لاندې دی. د هغه کورنۍ چې د خپل اړوند د وضعيت د معلومولو لپاره د طالبانو د استخباراتو رياست ته ورغلې، له بېلابېلو او يو له بل سره متناقضو ځوابونو سره مخ شوې ده.
فيض الله خان مخدومي چې د ډاکټر نجيب الله د واکمنۍ پر مهال هم يو پوځي منصبدار و، له جمهوري نظام د سقوط وروسته ايران ته تللی و او شاوخوا پينځه ويشت ورځې وړاندې یې هلته ژوند کاوه. د موجودو معلوماتو له مخې، د اقامت د تمديد نهکېدو له کبله، هغه اړ شو چې بېرته افغانستان ته راستون شي.
دا پېښه په داسې حال کې رامنځته کېږي چې طالبان تر واکمنېدو وروسته عمومي عفو اعلان کړې وه؛ خو پرلهپسې راپورونه د پخوانيو پوځیانو او چارواکو د نيولو، نادرکه کېدو او حتی وژنې په اړه، په ځانګړي ډول د هغو کسانو چې له ګاونډيو هېوادونو راستنېږي يا شړل شوي وي، جدي پوښتنې راپورته کوي چې دا عفو څومره عملي شوې او د خلکو حقونه څومره رعايت شوي دي.
