د اروپايي اتحاديې مشرانو د روسیې کنګل شتمنیو او اوکراین ته د مرستې پر سر غونډه وکړه
د اروپايي اتحاديې ۲۷ غړو هېوادونو مشران نن پنجشنبه په بروکسل کې د اروپايي شورا دوه ورځنۍ غونډه پیل کړه؛ غونډه چې پکې د روسیې کنګل شتمنیو د اوکراین لپاره د پور د برابرولو وړاندیز د بحث مهمه موضوع ده.
د خپرو شویو معلوماتو پر بنسټ، اروپايي مشران به د اوکراین مالي ملاتړ ته د دوام ورکولو لارو چارو، د امنیتي تضمینونو موضوع او سولې ته د رسېدو لپاره د دیپلوماتیکو هڅو په اړه خبرې وکړي. دا بحثونه په داسې حال کې ترسره کېږي چې د اوکراین جګړې لا هم پر اروپا پراخ سیاسي او اقتصادي اغېز کړی دی.
د اوکراین تر څنګ، د اروپايي اتحاديې د ۲۰۲۸ څخه تر ۲۰۳۴ کلونو لپاره د راتلونکې مالي بودجې چارچوب، د دې بلاک د پراخېدو بهیر او د هغه سیمهییز او اقتصادي وضعیت هم د غونډې په اجندا کې شامل دي. د غربې آسیا تحولاتو، دفاعي مسایلو او اروپايي مهاجرتي ننګونو ته هم د دې ناسته کې پام شوی دی.
د اروپايي اتحاديې مشران همداراز د دې اتحاديې د اقتصادي او سیاسي بهرنۍ فشارونو پر وړاندې د مقاومت د پیاوړتیا، د سوداګریزو پروګرامونو د چټکتیا، او د ستراتیژیکې خپلواکۍ او سیالۍ د ظرفیت د لوړولو په اړه هم بحث کوي.
دا غونډه په داسې حال کې له نږدې څارل کېږي چې اروپايي اتحاديې نږدې یوه اوونۍ مخکې د روسیې کنګل شتمنیو وضعیت تثبیت کړ او اوس د دغو شتمنیو د کارونې لپاره د حقوقي او سیاسي لارو برخلیک معلومېږي، څو اوکراین ته وړاندیز شوی پور تر لاسه کړي.
په همدې حال کې، د اروپايي اتحاديې پارلمان د سهشنبې په ورځ موافقه وکړه چې د اوکراین لپاره د مسکو له کنګل شتمنیو څخه د پور ورکولو قانوني مسوده چټکه وڅېړي؛ یوه کړنه چې د جنورۍ میاشتې په عمومي غونډه کې د رایې ورکولو لپاره زمینه برابروي.
