د اپستین او نتانیاهو د لیدنې اړوند ایميل افشا شو
نوې خپرې شوې اسناد د امریکایي پانګوال جفري اپستین د قضیې له دوسیې څخه څرګندوي چې له هغه سره تړاو لرونکی یو تن د ۲۰۱۴ کال په ترڅ کې له بنیامین نتانیاهو، د اسراییلو له لومړي وزیر، سره لیدنه کړې وه.
د راشا ټوډې د راپور له مخې چې له افشا شویو اسنادو څخه اخیستل شوی، دا ایميل د ۲۰۱۴ کال د اګست په ۹مه نېټه ثبت شوی او عنوان یې دی «له بيبي نتانیاهو سره د لیدنې انځور». خو انځور چې له دې ایمیل سره ضمیمه شوی و، په بشپړه توګه سانسور شوی او عامو خلکو ته نه دی وړاندې شوی.
په خپاره شوي متن کې د دې لیدنې د ځای او هدف په اړه نور جزئیات نه دي ورکړل شوي او دا هم روښانه نه ده چې د اپستین له لوري کوم کسان په دې لیدنه کې ګډون درلود. همدا ابهامونه د اپستین د شبکې له سیاسي څېرو سره د اړیکو په اړه نوي پوښتنې راولاړې کړي دي.
جفري اپستین د داسې یو کس په توګه پېژندل کېږي چې د تنکیو نجونو د جنسي ناوړه استفادې یوه پراخه شبکه یې اداره کوله او له بېلابېلو برخو د بانفوذو کسانو سره یې اړیکې لرلې. هغه په ۲۰۱۹ کال کې د جنسي قاچاق په تور له نیول کېدو وروسته په زندان کې مړ شو؛ دا پېښه خپله د دې قضیې له تر ټولو جنجالي برخو څخه ګڼل کېږي.
