د اپسټین دوسیه باکینګهم ماڼۍ ته ورسیده؛ دیموکراتانو د برتانیې د شاهي نظام د راتلونکي په اړه خبرداری ورکړ
یو دیموکرات استازی د امریکا د کانګرس څخه خبرداری ورکړی چې د مجرم جفري اپسټین د دوسیې وروستي افشاګري ښايي د برتانیې د شاهي نظام بقا له ګواښ سره مخ کړي او پراخ سیاسي اغېز ولري.
د نړیوالو رسنیو د راپور له مخې، «رو خانا» ویلي چې د شاهي نظام بنسټ په برتانیه کې اوس له هر وخت زیات زیانپذیر شوی، او که د اپسټین د دوسیې اړوند معلومات لا هم خپرېږي، نو دا به د خلکو باور په شدیده توګه کمزوری کړي.
هغه د پخواني برتانیوي سفیر پیټر مندلسون د نوم یادونه وکړه او ټینګار یې وکړ چې دا موضوع یوازې شخصي اړیکو پورې محدوده نه ده، بلکې د برتانیې ټول سیاسي جوړښت تر فشار لاندې راوستلی شي.
خانا له چارلز، د برتانیې له اوسني پاچا څخه غوښتي چې څرګنده کړي د خپل ورور شهزاده اندرو او د اپسټین ترمنځ د اړیکو په اړه څه معلومات لري. هغه زیاته کړه چې یوازې د اندرو څخه د شاهي لقب لیرې کول د خلکو د اندېښنو د رفع کولو لپاره کافي نه دي.
دغه څرګندونې په داسې حال کې کېږي چې د برتانیې لومړی وزیر، کیر ستارمر، هم د پیټر مندلسون او اپسټین د نږدې اړیکو له امله د استعفا غوښتنو سره مخ شوی دی.
