د ۸۴۵ میګاواټه برېښنا د پنځو پروژو د پیل تړونونه لاسليک کېږي
د رياستالوزرا اقتصادي مرستيالۍ ويلي چې سبا، د چهارشنبې په ورځ، د پنځو ستر بريښنا توليدي پروژو د پيل تړونونه، چې ټوليزه وړتيا يې ۸۴۵ ميګاواټه ده، لاسليک کېږي.
د ورکړل شوو معلوماتو له مخې، دا تړونونه د «عزيزي» د شرکتونو ډلې او «افغان برشنا شرکت» تر منځ لاسليک کېږي، او د لاسليک په مراسمو کې ملا عبدالغني برادر، د رياستالوزرا اقتصادي مرستيال، او ميرويس عزيزي، د عزيزي د شرکتونو د ډلې عمومي ريیس، ګډون کوي.
دغه پروژې د لمريزې انرژۍ او د ډبرو سکرو له سرچينو د بريښنا توليد رانغاړي؛ هغه سرچينې چې د طالبانو اداره په تيرو کلونو کې د وارداتي برېښنا د اړتيا د کمولو د پروګرامونو د برخې په توګه د هغو په پراختيا ټينګار کړی دی.
خو اقتصادي کارپوهان تل ټينګار کوي چې د دغسې پروژو بريا د تړونونو له روڼتيا، سالمې ادارې او د عامه ګټو د تضمين پورې تړلې ده؛ يو موضوع چې د خپلواکې څارنې او د مسؤلو ادارو د ځوابويکتوب له نشتوالي سره، د خلکو او د برېښنا د سکتور د فعالانو اندېښتې راپارولې دي.
