د دوشي – باميانو د سړک بيارغونه له بېلابېلو پرمختګونو سره روانه ده
د طالبانو د عامه ګټو وزارت ويلي، چې د بغلان ولایت د دوشي ولسوالۍ او د باميانو د مرکز ترمنځ د ۱۷۰ کیلومتره سړک د بيارغونې او پراخولو پروژه په څو برخو کې له بېلابېلو پرمختياوو سره روانه ده.
د دغه وزارت د خپرو شويو معلوماتو پر بنسټ، په دې مسير کې د ۲۲ کیلومتره سړک د درندو خاكداريو كار روان دی. همداراز، په ۱۸ کیلومتره بله برخه کې نرمې خاكکيندنې روانې دي او د ۲۲ کیلومتره سړک د برابرولو او ډکولو چارې نېږدې پای ته رسېدلي.
د دوشي–باميانو سړک د هېواد په مرکزي سیمو کې له مهمو مواصلاتي لارو څخه ګڼل کېږي. دا لار د سالنګ لویې لارې بديله ګڼل کېږي، او هغه مهال چې سالنګ د واورې، د غرښويي يا تخنيکي کارونو له امله بند شي، خلک او مسافر کولی شي چې د باميانو له لارې سفر وکړي.
سره له دې، چې دا لار ستراتیژیک اهمیت لري، خو د پروژې د تطبیق په بهير کې د شفافيت نشتوالی او د طالبانو ادارې له موثريت سره د خلکو بېباوري، د دې پروژې د کیفیت او پر وخت بشپړېدو په اړه اندېښنې راپارولي دي. تر دې مخکې هم، خپلې ځينې ورته پروژې طالبان له لازم تخنيکي څارنې پرته پای ته نه دي رسولې.
