په کابل کې زرګونه نشهيي ګولۍ وموندل شوې
د طالبانو د کورنيو چارو وزارت چارواکي وايي، د مخدره موادو پر ضد پوليسو د يوه ځانګړي عمليات په ترڅ کې په کابل ښار کې زرګونه نشهيي ګولۍ موندلې او ضبط کړي دي.
د ورکړل شويو معلوماتو له مخې، په دې عملياتو کې ټول ۱۴ زره او ۲۰۰ دانه ګولۍ چې د «کا» په نوم يادېږي، د پوليسو لاس ته ورغلي دي. ويل شوي چې دا اندازه مواد له څو بېلابېلو ځايونو څخه راټول شوي دي.
دغه عمليات د کابل ښار د پنځمې امنيتي حوزې په سيمه کې ترسره شوي، خو د دقيق ځای، د نيول شويو کسانو يا د موادو د ښار سيمو ته د انتقال څرنګوالي په اړه نور جزئيات نه دي ورکړل شوي.
په داسې حال کې چې د طالبان اداره د مخدره موادو پر ضد د مبارزې د دوام خبره کوي، څارونکي بنسټونه تل ټينګار کوي چې په داسې قضيو کې شفافيت، دقيق معلومات او حسابورکول د ولسي اعتماد د جلب او د دغو اقداماتو د اغېزمنتيا د ارزونې لپاره ضروري دي.
