په ختيځ افغانستان کې د پاکستان سره د نښتو له امله ۶۸ زره ماشومان بېځايه شوي
د ماشومانو د ژغورنې سازمان ويلي، د افغانستان او پاکستان تر منځ د وسلهوالو نښتو د زياتېدو له امله لږ تر لږه ۶۸ زره ماشومان د هېواد په ختيځ ولايتونو کې بېځايه شوي دي. د دې راپور له مخې، چې د سهشنبې په ورځ خپور شو، د ناامنيو پراخېدو د زرګونو کورنيو ژوند ګډوډ کړی او د ماشومانو د زدهکړې او بنسټيزو خدماتو ته لاسرسی محدود شوی دی.
دغه اداره زياتوي، نږدې ۱۳۴ زره کسان د روغتيايي، تغذيې، د ماشومانو د ساتنې او تعليمي پروګرامونو د درېدلو يا ګډوډۍ له امله زيانمن شوي دي. د ماشومانو د ژغورنې د څرګندونو له مخې، د سلګونو درسي ټولګيو او موقتي تعليمي مرکزونو تړل کېدو له امله له دې ادارې او د هغې له همکارانو سره اته زره ډېره هغه ماشومان دا مهال له زدهکړې بېبرخې شوي دي.
په راپور کې راغلي، بېځايه ماشومان بېړني ډول د محافظتي ملاتړ او رواني-ټولنيزو خدمتونو ته اړتيا لري. همدارنګه، يو شمېر د ماشومانو د پاملرنې مرکزونه موقتاً تړل شوي، چې د زيانمن ماشومانو د وضعيت په تړاو اندېښنې زياتې کړي دي.
د ملګرو ملتونو د احصايو له مخې، چې په دې راپور کې راوړل شوې، له ۲۶ فېبرورۍ راهيسې لږ تر لږه ۵۶ تنه وژل شوي او تر ۱۲۰ زيات نور ټپيان شوي دي، چې ډېری يې ښځې او ماشومان دي. په همدې مهال، په داسې حال کې چې په هېواد کې له هر درې وګړو يو تن د خوراکي مرستو اړتيا لري، د نړيوال خوراکي پروګرام لهخوا د اړمنو سيمو لپاره د خوراکي توکو د وېش درېدلو شاوخوا ۱۶۰ زره کسان اغېزمن کړي دي.
ارشـد ملک، د ماشومانو د ژغورنې د آسيايي سيمې مشر، له ټولو اړخونو غوښتي چې تاوتريخوالی کم کړي او ماشومانو ته د هر ډول حالاتو لاندې د خونديتوب ډاډ ورکړي. هغه ټينګار کړی چې د نړيوالو بشري قوانينو بشپړه مراعت، د ملکي کسانو په ځانګړي ډول د ماشومانو ساتنه او د دايمي اوربند ژر ټينګښت اړين دي.
تاوتريخوالی وروسته له هغې زيات شو، چې د طالبانو د ادارې د چارواکو په وينا، د فبرورۍ په ۲۱مه د پاکستان پوځ د افغانستان هوايي قلمرو نقض کړی او د ننگرهار په ختيځ او پکتیکا په سوېل ختيځ کې يې پر ملکي سيمو بريدونه ترسره کړي دي. په مقابل کې، د طالبانو اړوند ځواکونو د فبرورۍ له ۲۶مې د پاکستان پر پوځي تاسيساتو بريدونه پيل کړي دي.
د طالبانو د ادارې چارواکي ادعا کوي چې په دې نښتو کې يې پاکستاني لوري ته درانه تلفات اړولي، خو د دې ادعا په تړاو خپلواکه جزئيات نه دي ورکړل شوي. د دغه حالت دوام د سرحدي سيمو د بشري بحران د پراخېدو اندېښنې زياتې کړې دي.
