د ملګرو ملتونو د امنیت شورا له خوا د امریکا پر پوځي اقدام د ونزوېلا د غوښتنې له مخې غونډه وشوه
د ملګرو ملتونو د امنیت شورا د دوشنبې په ورځ د ونزوېلا د غوښتنې پر بنسټ غونډه پیل کړه، څو د امریکا متحده ایالاتو پوځي اقدام په دغه هېواد کې وڅېړي. د دې غونډې اصلي تمرکز د یاد اقدام امنیتي او قانوني پایلو ته په ملي او سیمهیزه کچه متوجه و.
غونډه د سومالیا د استازي، چې د امنیت شورا د نوبتی رئیس په توګه دنده لري، په وینا پیل شوه. تر غونډې مخکې د روسیې دایمي استازي واسیلي نبنزیا ویلي وو چې شورا به د امریکا د اقدام موضوع او د ونزوېلا د ولسمشر نیکولاس مادورو د نیولو راپورونه هم وڅېړي.
په همدې تړاو د ونزوېلا د بهرنیو چارو وزیر ایوان خیل پینتو په یوه رسمي لیک کې د ملګرو ملتونو له سازمانه د امنیت شورا د بیړنۍ غونډې غوښتنه کړې وه او د امریکا اقدام یې د خپل هېواد د حاکمیت سرغړونه او د ملي امنیت پر وړاندې ګواښ بللی و.
د غونډې پر مهال د ملګرو ملتونو د سرمنشي مرستیالې دیکارلو رزمري د ونزوېلا د احتمالي بېثباتۍ د زیاتېدو په اړه خبرداری ورکړ او ویې ویل چې دغه وضعیت کولی شي د سیمې پر ثبات او د هېوادونو ترمنځ پر اړیکو اغېز وکړي. هغې همدارنګه د ملګرو ملتونو اندېښنه څرګنده کړه چې دا پوځي عملیات باید د نړیوالو قوانینو له اصولو سره سمون ولري.
د ملګرو ملتونو مرستیالې ټینګار وکړ چې دغه نهاد به هغو هڅو ملاتړ ته دوام ورکړي چې موخه یې د ونزوېلا د کړکېچ سولهییز، هراړخیز او د خبرو پر بنسټ حل لاره موندل وي.
د روسیې استازي په امنیت شورا کې د امریکا پر اقدام سخت انتقاد وکړ، او ویې ویل چې دا کار د نړیوالو قوانینو ښکاره سرغړونه ده. هغه غوښتنه وکړه چې د ونزوېلا منتخب ولسمشر او د هغه مېرمن دې سمدستي خوشې شي. نوموړي زیاته کړه چې د هېوادونو ترمنځ اختلافونه باید د خبرو او دیپلماتیکو لارو له لارې حل شي، نه د زور د کارولو له لارې.
