د ګډ امنیت تړون سازمان د افغانستان د ترهګرو ډلو له ګواښ څخه خبرداری ورکړ
د ګډ امنیت تړون سازمان د ګډو ځواکونو مشر خبرداری ورکړی چې د افراطیت او ترهګرو ډلو حضور او فعالیتونه په افغانستان کې لا هم د منځنۍ آسیا د هېوادونو د ثبات او امنیت لپاره جدي ګواښ ګڼل کېږي او کولی شي ناامني نژدې سیمو ته هم خپره کړي.
د تاس خبري اژانس د راپور له مخې، اندري سړدیوکوف د پنجشنبې په ورځ په یوه خبري ناسته کې وویل چې د بېلابېلو نړیوالو افراطي او ترهګرو ډلو شتون په افغانستان کې د منځنۍ آسیا په امنیتي وضعیت مستقیم او منفي اغېز لري. د ده په وینا، دا حالت د ترهګرۍ د خپرېدو خطر هغو هېوادونو ته زیات کړی چې له افغانستان سره ګډه پوله لري.
سړدیوکوف د رادیکال نظریو د خپرېدو او د مخدره موادو قاچاق د سیمې له نورو جدي امنیتي ننګونو وبلل؛ هغه مسایل چې د کلونو راهیسې د منځنۍ آسیا هېوادونه له جدي اندېښنو سره مخ کړي دي. افغانستان د خپلې جغرافیوي موقعیت له امله، چې د منځنۍ آسیا ګاونډی دی، تل د دې سیمې په امنیتي معادلو کې مهم رول لري.
سره له دې چې څو کاله د طالبانو د واکمنۍ له تېرېدو وروسته، لا هم د امنیتي ګواښونو د مهار او د وسلهوالو ډلو د مدیریت په اړه اندېښنې دوام لري. منتقدانو څو ځله له د طالبانو له مشرتابه غوښتي چې د ترهګرو شبکو پر فعالیتونو روڼ عمل وکړي او د داسې عملي او د باور وړ ګامونه پورته کړي چې د افغانستان د خاورې د کارونې مخه ونیسي چې پر نورو هېوادونو د برید لپاره وکارول شي.
یاد پوځي چارواکي همدارنګه د جنوبي قفقاز وضعیت «اندېښمنونکی» وباله او ویې ویل، د زړو نه حل شوو شخړو د نویو جیوپولیتیکو ننګونو له ګډېدو سره د سیمې امنیتي حالت لا پسې پېچلی شوی دی. ده زیاته کړه چې د لوېدیځو هېوادونو هڅو چې غواړي په جنوبي قفقاز کې خپل نفوذ زیات کړي، د دغې سیمې وضعیت نوره هم پېچلې کړی ده.
سړدیوکوف په پای کې ټینګار وکړ چې د ګډ امنیت تړون سازمان د مسؤلیت په ساحه کې امنیتي وضعیت لا هم «ترینګلی او نامعلوم» پاتې شوی او د نړیوالو اړیکو د شخړو په دوام سره د احتمالي جګړو د پراخېدو خطر شته.
له دې وړاندې هم د روسیې د بهرنیو چارو وزیر سرګي لاوروف د ګډ امنیت تړون سازمان له مشر سره په کتنه کې د افغانستان په دننه کې د ترهګرو ډلو د موجودیت په اړه اندېښنه څرګنده کړې وه. روسیه، سره له دې چې له د طالبانو ادارې سره رسمي اړیکې لري، د دغو ډلو حضور د خپل او د ګډو خپلواکو هېوادونو لپاره مستقیم امنیتي ګواښ بولي.
