د کانګو په روبایا سیمه کې د کلتان د کان ریزش له امله له ۲۰۰ ډېر کسان مړه شول
په دیموکراتیکه کانګو جمهوریت کې د شمالي کیوو ولایت د روبایا په سیمه کې د کلتان د یوې کان ریزش له امله له ۲۰۰ زيات کسان خپل ژوند له لاسه ورکړی دی. سیمه ییز چارواکي وايي، د لټون او د قربانیانو د راایستلو هڅې لا هم روانې دي او د دقیقو تلفاتو شمېر لا نهدی معلوم.
دا پېښه د چهارشنبې په ورځ رامنځته شوې وه، خو تر جمعې پورې د قربانیانو کره شمېر نهو څرګند شوی. د یاد ولایت د هغو ډلو لهخوا ټاکل شوي والي ویاند چې د وسلوال مخالفتونو تر واک لاندې سيمه لري، د تر ۲۰۰ زياتو کسانو مړینه تایید کړه او ويې ويل چې لږ تر لږه ۲۰ ټپيان د طبي پاملرنې لاندې دي.
د دغه سیمه ییز چارواکي په وینا، وژل شوي کسان د کان کارګر، ښځې او ماشومان دي. یو شمېر کسان په وروستیو شېبو کې له نخرو څخه راایستل شوي، خو سخت ژوبل دي او د ځينو روغتيايي حالت د اندېښنې وړ بلل شوی.
د روبایا کان د شمالي کیوو د مرکز، ګوما ښار، له شمال لوېديځ څخه شاوخوا ۶۰ کیلومتره لرې موقعیت لري. تر اوسه يو شمېر مړي له سيمې راایستل شوي او د ورکو کسانو د موندلو هڅې دوام لري.
روبایا د نړۍ له مهمو د کلتان د استخراج له مرکزونو څخه ګڼل کېږي او شاوخوا ۱۵ سلنه د دې معدني موادو نړیواله عرضه برابروي. کلتان د ټانټالوم د تولید لپاره کارول کېږي، چې دا فلز د لوړ حرارت پر وړاندې مقاومت لري او د ګرځنده تليفونونو، کمپيوټرونو، فضايي وسايلو او د ګازو د توربينونو د جوړولو په برخه کې کارېږي.
د سيمې اوسېدونکي وايي، د کلتان استخراج دلته په دودیز ډول او له ابتدايي وسايلو سره ترسره کېږي، او کارګران د جدي خطرونو په وړاندې يوازې لږ مزدوري ترلاسه کوي. دا سيمه د ۲۰۲۴ کال له پيله د وسلوالې ډلې AFC/M۲۳ تر کنټرول لاندې ده، چې له امله يې د کارګرو د خوندیتوب او د اغېزناک څار د نشتوالي په اړه اندېښنې زياتې شوې دي.
