چین: د امريکا ملاتړ له تايوان سره نښته رامنځته کولی شي
د چين د بهرنيو چارو وزير وانګ يي خبرداری ورکړی چې د متحده ايالاتو ملاتړ له تايوان سره د بېلتون غوښتونکو له غورځنګونو سره کولای شي د بيجنګ او واشنګټن تر منځ جدي تاوتريخوالی او حتی نښته رامنځته کړي. هغه ټینګار وکړ چې د تايوان موضوع د چين او امريکا په اړيکو کې «سور کرښې» ته ورته ده.
د هغه په وينا، په امريکا کې ځينې کړۍ هڅه کوي د چين د پرمختګ او ودې بهير محدود کړي. وانګ زياته کړه چې هر ډول هڅه د تايوان د چين څخه د بېلوالي لپاره، د دواړو هېوادونو د اړيکو ثبات ته مستقيم ګواښ دی.
د چين د بهرنيو چارو وزير همدارنګه د نړيوال نظام ناکامي د هغو هېوادونو د چلند پايله وبلله چې ځانونه له نورو غوره ګڼي. هغه پرته له دې چې کوم هېواد په نوم ياد کړي، له دې تګلارې انتقاد وکړ او دا يې د نړيوالې همکارۍ پر وړاندې خنډ وباله.
وانګ يي د خپلو خبرو په بله برخه کې د اوکراين جګړې ته اشاره وکړه او د سولې د بهير په اړه يې د اروپا فعاله ونډه وستايله. هغه وويل اروپا بايد يوازې نندارچي پاتې نه شي، بلکې اړينه ده چې د سولې د خبرو مېز ته په اغېزمنه توګه حاضره وي.
دغه لوړپوړي چينايي ډيپلوماټ روښانه کړه چې بيجنګ د اوکراين د جګړې مستقيم لوری نه دی او د جګړې د پای پرېکړه د چين په واک کې نه ده، خو چين د سولې د لاسته راوړلو لپاره د ښکېلو خواوو تر منځ د فشار ملاتړ کوي.
هغه همدارنګه د اروپا او روسيې د خبرو اترو د پيل هرکلی وکړ او له اروپايي اتحاديې يې وغوښتل چې د بحران د حل لپاره خپل طرحې او وړانديزونه وړاندې کړي.
د اوکراين د سولې وروستۍ پړاو خبرې د روسيې، اوکراين او امريکې د استازو په ګډون په ابوظبي کې ترسره شوې. له څو پړاونو خبرو وروسته هم جګړه لا روانه ده او د ځمکنيو سرحدي اختلافاتو موضوع لا هم د توافق تر ټولو لوی خنډ ګڼل کېږي.
روسيه او اوکراين دواړه هڅه کوي چې د خپلو تر کنټرول لاندې سيمو د ساتلو او پراخولو له لارې، هم په جګړه کې او هم د خبرو اترو په بهير کې، برلاسي ترلاسه کړي.
