په پروان ولايت کې د سالنګ ولسوالۍ په يوه عمليات کې څلور تښتول شوي ماشومان ژغورل شوي
د بلخ ولايت له مرکز مزارشريف ښار څخه څو ورځې مخکې د نامعلومو کسانو لهخوا تښتول شوي څلور ماشومان د پروان ولايت د سالنګ ولسوالۍ په يوه عمليات کې ژغورل شوي دي. د امر بالمعروف، نهي عن المنکر او شکايتونو د اورېدو وزارت ويلي چې دغه عمليات د امنيتي ځواکونو په همکارۍ ترسره شوی دی.
د دې وزارت د خبرپاڼې له مخې، له خلکو د راپورونو تر ترلاسه کولو او له لومړنيو څېړنو وروسته، د ماشومانو د ساتنې ځای وپېژندل شو او دوی په وختي اقدام کې د تښتوونکو له منګولو ازاد کړل شول. د تښتوونکو د هويت او د ماشومانو د انتقال څرنګوالي په اړه نور جزئيات نه دي خپاره شوي.
د ژغورل شويو ماشومانو سپارل د قانوني مراحلو او اړينو څېړنو له بشپړېدو وروسته، د بلخ ولايت د امر بالمعروف رياست په همغږۍ د هغوی کورنيو ته ترسره شول. کورنيو د خپلو ماشومانو د بيرته راګرځېدو له امله خوښي څرګنده کړه او له چارواکو يې غوښتي چې له عاملانو سره دې جدي چلند وشي.
دغه وزارت له امنيتي او استخباراتي ادارو غوښتي چې د قضیې عاملان ونيول شي او د عدلي او قضايي مراحلو لپاره اړوندو مراجعو ته وسپارل شي. په عين حال کې، په ځينو ولايتونو کې د تښتونو د پېښو تکرار د خلکو تر منځ اندېښنې رامنځته کړې دي، او تمه کېږي چې د طالبانو اداره د ماشومانو د امنيت د خوندي کولو او د دغسې پېښو د مخنيوي لپاره روڼ او مخنيوي کوونکي ګامونه واخلي.
