په جوزجان کې د دوو ماشومانو وژنه او د یوې مور ټپي کېدل
د جوزجان ولایت د خمآب ولسوالۍ په نوآباد کلي کې د شنبې په ماښام شاوخوا پنځه بجې یوه له ویرې ډکه پېښه رامنځته شوې، چې له امله یې دوه ماشومان وژل شوي او یوه مېرمن له خپلې کشرې لور سره ټپي شوې ده.
د طالبانو د جوزجان ولایت د امنیې قوماندانۍ د جنایي جرمونو پر ضد د مبارزې آمریت، د یکشنبې په ورځ (۹ قوس) په خپره شوې خبرپاڼه کې د دې پېښې پخلی کړی دی. د معلوماتو له مخې، یوه ۳۵ کلنه مېرمن په نوم د ضیاګل له خپلو درې اولادونو سره لومړی خفه شوې او بیا پرې چاړه وهلې شوې ده.
په دې برید کې دوه واړه ماشومان چې عمرونه یې درې او څلور کاله ښودل شوي، خپل ژوند له لاسه ورکړی دی. همداراز، ضیاګل او بله کشره لور یې ټپي شوې دي او روغتیايي مرکزونو ته انتقال شوې دي.
د پېښې مسؤلیت هېڅ یوې ډلې نهدی منلی، خو په هغو سیمو کې چې د طالبانو تر اداره لاندې دي، د ورته تاوتریخوالي پېښو زیاتېدلو د ځایي اوسېدونکو اندېښنې ډېرې کړې دي. د قضیو د تعقیب شفافیت نهشتون او د خپلواکو بنسټونو نهحضور، د داسې جنایتونو د تکرار زمینه برابروي.
دا په داسې حال کې ده چې طالبان په جوزجان کې د ناامنۍ د زیاتېدو راپورونه ورکوي، خو دوی له جنایي قضیو سره غیرمسلکي چلند د خلکو او اوسني نظام ترمنځ د بېباورۍ لامل شوی دی.
