په بلخ کې د ماشومانو دروند کار؛ د ژوندي پاتې کېدو لپاره د کثافاتو راټولول
د بلخ ولایت د فقر زیاتېدو او د کاري فرصتونو د نشتوالي له امله، ګڼ شمېر ماشومان او تنکۍ ځوانان اړ شوي چې د خپلو کورنیو د لومړنیو اړتیاوو د پوره کولو لپاره په سختو او له خطر ډکو کارونو، لکه د کثافاتو او پلاستيک راټولولو، بوخت شي؛ دا وضعیت جدي ټولنیزې او روغتیایي اندېښنې راپارولې دي.
د مزارشریف اوسېدونکي وایي، د کار نشتوالي او د مناسب معاش ناسم وضعیت هغوی مجبور کړي چې له سهاره تر ماښامه د ښار په ککړو سیمو کې کار وکړي.
ډاکتران خبرداری ورکوي چې د ماشومانو مستقیم تماس د کثافاتو سره د ساري ناروغیو د خپرېدو خطر په جدي توګه زیاتوي. ډاکتر مصطفی خوشیوال وایي، داسې ناروغۍ لکه هیپاتایت A او B او حتی HIV/AIDS، په ځانګړې توګه د ککړو سرنجونو د تماس له امله، له هغو احتمالي پایلو څخه دي چې د یو نسل روغتیا ګواښي.
اقتصادي کارپوهان دا وضعیت د اوږدو کلونو جګړو او بېثباتۍ پایله ګڼي چې د هېواد اقتصادي بنسټونه یې له منځه وړي او د کار زمینه یې سخت محدوده کړې ده. د قطبالدین یعقوبي په وینا، د جګړو دوام سوداګریز فعالیتونه فلج کړي او کورنۍ یې مزمن فقر ته ټېل وهلې دي.
په همدې حال کې، د طالبانو د ادارې چارواکي ادعا کوي چې د کاري فرصتونو د رامنځته کولو لپاره یې بېلابېلې هڅې کړي دي. د کار او ټولنیزو چارو وزارت ویاند وایي، د کار بازار د تنظیم لپاره غونډې ترسره شوې دي، خو منتقدان ټینګار کوي چې دا هڅې په عمل کې نه دي توانېدلې د ماشومانو له سخت کار څخه مخنیوی وکړي، او دا د ماشومانو د حقونو د خونديتوب او د کورنیو د لومړني معیشت د تأمین په برخه کې د جوړښتي بېوسۍ نښه ده.
