بلومبرګ: د امریکا د بهرنیو چارو وزیر به د وینزېویلا د وضعیت اداره پر غاړه واخلي
په داسې حال کې چې د کاراکاس چارواکي د وینزېویلا د حاکمیت د دفاع ټینګار کوي، یوه نړیواله رسنۍ راپور ورکړی چې د وروستیو بدلونونو وروسته، د امریکا د بهرنیو چارو وزیر به د دغه هېواد د وضعیت په اداره کې مهمه ونډه ولري.
د نړیوالې خبري آژانس بلومبرګ د باخبره سرچینو له قوله لیکلي چې مارکو روبیو، د امریکا د بهرنیو چارو وزیر، د وینزېویلا د ولسمشر د تښتونې وروسته د دې قضیې د مدیریت مرکزي څېره ګڼل شوې ده. یادو سرچینو د دې رول د څرنګوالي په اړه نور جزئیات نه دي ورکړي.
تر دې وړاندې یو شمېر امریکایي رسنیو له روبیو څخه د دونالد ټرمپ د حکومت د لوېدیځ نیمهکرې، په ځانګړې توګه د لاتینې امریکې، د سیاستونو د اصلي طراح په توګه یادونه کړې وه؛ رول چې د دغه راپور له مخې اوس تر پخوا لا پیاوړی شوی دی.
د دغو راپورونو له مخې، متحده ایالاتو د جمعې په شپه پر وینزېویلا برید کړی او د دغه هېواد ولسمشر او د هغه مېرمن یې تښتولي دي؛ دا اقدام د ځینو هېوادونو له منفي غبرګون سره مخ شوی او د ملګرو ملتونو د منشور او نړیوالو قوانینو د سرغړونې په توګه یاد شوی دی. هممهاله، د وینزېویلا د ولسمشر مرستیال د هغه څه پر وړاندې چې یې «د امریکا امپريالیزم» بللی، د مقاومت ټینګار کړی دی.
