بنګویر د غزې د اوربند دويم پړاو سره مخالفت وکړ
د اسرایيلو د کابینې يو جګپوړی چارواکی د غزې په تړانګه کې د اوربند د دويم پړاو د پيل سره مخالفت څرګند کړی او ويلي يې دي چې دا کار به يوازې هغه وخت ترسره شي چې حماس بشپړ بې وسلې شي او د اسرایيلو وروستی اسير بېرته راستانه شي. د فلسطين د معلوماتو مرکز د راپور له مخې، د اسرایيلو د راډيو او تلويزيون ادارې وويل چې ايتامار بنګوېر، د دې هېواد د کورنيو چارو توندروى وزير، ټينګار کړی چې تر هغه وخته چې د وروستي اسرایيلی اسير مړی له غزې نه وي لېږدول شوی، تلابيو بايد د اوربند دويم پړاو ته داخل نه شي. بنګوېر چې د غزې د جګړې د بندېدو سخت مخالف بلل کېږي، همدارنګه ادعا کړې چې تر څو حماس په بشپړه توګه بې وسلې شوی نه وي، هېڅ سياسي يا امنيتي ګام بايد وانخيستل شي. دغه اسرایيلی چارواکی همدارنګه هيله څرګنده کړې چې بنيامين نتنياهو دې د ترکيې له خوا د غزې په تړانګه کې له هر ډول شتون او رول لوبولو سره موافقه ونه کړي، هغه دريځ چې د دې سيمې د راتلونکي سياسی او ديپلوماتيک حالت د لا پېچلتيا لامل کېدای شي.
