په کابل کې د برهکي هوايي پل دويم پړاو کار پيل شو
د کابل ښاروالۍ وايي چې د برهکي هوايي پل د دويمې برخې ساختماني چارې په رسمي ډول پيل شوې دي؛ دغه پروژه د پلازمېنې له خورا ګڼو سيمو څخه د ترافيکي ګڼه ګوڼې د کمولو لپاره جوړه کېږي.
د کابل ښاروالۍ استازي نعمتالله بارکزي وويل، د پل دويمه برخه به ۴۴۰ پايې ولري، ۷۰۰ متره اوږدوالی به یې وي او د دويم پروان څلور لارې له دهنباغ سيمې سره نښلوي. نوموړي زياته کړه، د دې برخې عملي کارونه په رسمي ډول شروع شوي دي.
بارکزي همداراز وضاحت ورکړی چې د پل لومړۍ برخه چې ځمکني سړکونه هم پکې شامل دي، ۴۷۰ متره اوږدوالی او ۵۲۵ پايې لري، او تر دې دمه نږدې ۷۵ سلنه پرمختګ کړی دی. د هغه په وينا، د دې برخې تر بشپړېدو وروسته به د ترافيک په منظمېدو کې مهم رول ولري.
د کابل ښاروالۍ د معلوماتو له مخې، د برهکي هوايي پل په دوو پړاوونو او د ټولټال ۱.۵ ميليارده افغانيو په لګښت جوړېږي. د ښاروالۍ چارواکي وايي دا پروژه به د دغې سيمې د ترافيکي ازدحام په کمولو کې مرسته وکړي، خو د کابل اوسېدونکي تل د عامه پروژو په ترسره کولو کې د لا زيات شفافيت او چټکتيا غوښتنه کوي.
په ورته وخت کې، ښاروالۍ د هغه هوايي پل د چټک پرمختګ خبر هم ورکړی چې د کابل ولايت مقام له جویشېر سره نښلوي؛ پروژه چې د ښار د زيربنايي ودې د پروګرامونو يوه برخه هم بلل کېږي.
