په بامیان کې د ګرځندویانو شمېر ډېر شوی، خو د اسانتیاوو نشتون لا هم دوام لري
د بامیان د ګرځندوی ریاست ویلي چې د روان لمریز کال له پیل څخه تر اوسه پورې له ۵۱۷ زرو څخه ډېر کورني او بهرني سیلانیان دې ولایت ته ورغلي دي؛ دا شمېر، د ادارې د مسوولینو په وینا، د تېر کال په پرتله دوه نيم ځله ډېروالی ښيي.
سید احمد ضیا کاظمي، د بامیان د ګرځندوی آمر، ویلي چې هڅې د ګرځندوی صنعت د ودې لپاره روانې دي، خو بنسټیزې ستونزې لا هم شتون لري. د ده په وینا، د تاریخي او تفریحي سیمو پر لور د لارو خرابوالی، د مسلکي لارښودانو نشتوالی او د اړینو اسانتیاوو کمښت د سیلانیانو پر وړاندې جدي ننګونې جوړوي.
بامیان، چې د غرني موقعیت او د تاریخي آثارو او طبیعي منظرو له امله د افغانستان له مهمو ګرځندویو ځایونو ګڼل کېږي، هر کال د زرګونو لیدونکو کوربه وي. خو د طالبانو د ادارې له لوري د بنسټیزو خدمتونو د پراختیا او اغېزمن پلانونو نشتوالی لامل شوی چې د دې ولایت د ګرځندوی ظرفیتونه په بشپړه توګه و نه کارول شي.
د سیمې اوسېدونکو تر دې وړاندې څو ځله پر دې ټینګار کړی چې د لارو رغونه، د خدماتي مرکزونو جوړول او د مسلکي لارښودانو روزنه ضروري ده؛ دا ګامونه کولی شي نه یوازې ډېر سیلانیان راجلب کړي، بلکې د دې ولایت د کارموندنې او اقتصادي ودې زمینه هم برابره کړي.
