طالبانو د حماس د وياند د وژل کېدو له امله خواشينې څرګنده کړه
د فلسطين د وروستيو پېښو په تړاو، د طالبانو د ادارې وياند ذبيحالله مجاهد د يوې اعلاميې په خپرولو سره د حذيفه الکحلوت، چې په ابوعبيده مشهور و او د قسام بريګيډ د نظامي څانګې وياند و، د وژل کېدو ترڅنګ د دې غورځنګ د يو شمېر قومندانانو مرګونه تسليت وويلي دي.
په ياده اعلاميه کې مجاهد دغه کسان «د اسلام د لارې شهيدان» بللي او ويلي يې دي، چې دوی د ده په باور خپل هدف ته رسېدلي دي. د طالبانو د ادارې وياند له حماس غورځنګ، د وژل شويو کورنيو او خپلوانو سره د غمرازۍ تر څنګ، د هغوی لپاره د صبر او زغم هيله څرګنده کړې ده.
هغه زياته کړه، د طالبانو د ادارې په باور، د دغو وژل شويو وينه کولی شي د فلسطين د ازادۍ زمينه برابره کړي. دا څرګندونې د طالبانو د سياسي او فکري دريځ په چوکاټ کې شوې دي او د فلسطين او اسرائيلو د شخړې په اړه د دې ادارې رسمي نظر څرګندوي.
په عين حال کې، د اسلامي مقاومت غورځنګ حماس په يوه جلا اعلاميه کې د خپل وياند ابوعبيده او د حماس د پخواني مشر يحيی سنوار ورور محمد سنوار د وژل کېدو خبر تأييد کړی دی. دا دريځونه په داسې حال کې څرګندېږي چې د طالبانو اداره د بهرنيو پېښو په اړه غبرګون څرګندوي، په داسې حال کې چې افغانستان د دننيو پراخو ننګونو، په ځانګړې توګه د اقتصادي او بشري حقونو له بحرانونو سره مخ دی.
