په بهسود کې د ورک شويو کسانو د مړو لټون لا هم روان دی
د پاکستاني پوځ له برید دوه ورځې وروسته، چې د ننګرهار ولایت د بهسود ولسوالۍ یو شمېر برخې یې په نښه کړې وې، د پېښې د څلور قربانیانو مړي لا هم نه دي موندل شوي. دغه برید چې د «ګردي کڅ» سیمه یې هدف ګرځولې وه، د ۱۳ کسانو د وژل کېدو سبب شو او د هغوی د جنازې مراسم پرون ترسره شول.
د ننګرهار سیمهییزو چارواکو ویلي دي، د بهسود تر قربانیانو سربېره، هوايي بریدونو په خوګیاڼي او مومندره ولسوالیو کې هم تلفات اړولي دي. د دغو بریدونو په پایله کې دوه ماشومان په خوګیاڼو کې ټپیان شوي دي.
راپورونه هم څرګندوي چې په مومندره ولسوالۍ کې بل یو ماشوم د پاکستاني ځواکونو د درندې وسلې «دهشکه» د ډزو له امله ټپي شوی دی. دغه وسله یوه درنه او اتوماتيکه وسله ده، چې عموماً په پوځي نښتو کې کارول کېږي.
چارواکي زیاتوي چې د خوګیاڼي او مومندره درې ټپیان عام ملکي کسان دي او درملنې لپاره د ننګرهار حوزوي روغتون ته انتقال شوي دي. تر اوسه د څلورو ورکو شويو کسانو د برخلیک په اړه نور جزئيات نه دي خپاره شوي.
